റിയാദ്: പതിനാറു വയസ്സുള്ള പെണ്കുട്ടിയെ വിവാഹം കഴിച്ച് പീഡിപ്പിച്ച് റിയാദിലേക്കു മുങ്ങിയ യുവാവിനെ ഇന്റര്പോളിന്റെ സഹായത്തോടെ കേരള പോലീസ് കേരളത്തിലെത്തിച്ചു. ഇന്നു പുര്ച്ചെ നാട്ടിലെത്തിച്ച യുവാവിനെതിരെ പോലീസ് വിശദമായ അന്വേഷണം നടത്തിവരികയാണ്. ഭാര്യയായ പതിനാറുകാരിയുടെ പരാതിയിലാണ് യുവാവിനെതിരെ കേസെടുത്തത്. ഇതോടൊപ്പം ശൈശവ വിവാഹ നിരോധന നിയമമനുസരിച്ച് വരന്റെയും വധുവിന്റെയും മാതാപിതാക്കള്ക്കെതിരെയും കേസെടുത്തിട്ടുണ്ട്.
വിവാഹ ശേഷം റിയാദിലേക്കു പോയ മണ്ണാര്ക്കാട് സ്വദേശിയായ യുവാവിനെ രണ്ടു വര്ഷത്തിന് ശേഷമാണ് പോലീസ് പിടികൂടിയത്. പോക്സോ കേസ് ആണ് യുവാവിനെതിരെ ചുമത്തിയിരുന്നത്. റിയാദില് ജോലി ചെയ്തിരുന്ന ഇയാള് അവധിക്ക് നാട്ടിലെത്തിയാണ്് പതിനാറുകാരിയെ വിവാഹം ചെയ്തത്. 2022-ലായിരുന്നു വിവാഹം. ഏതാനും ദിവസങ്ങള്ക്കു ശേഷം ഇയാള് റിയാദിലേക്കു മടങ്ങി. എന്നാല് പിന്നീട് വധുവും ബന്ധുക്കളും ചേര്ന്ന് യുവാവിനെതിരെ പീഡനം ആരോപിച്ച് കേസ് നല്കുകയായിരുന്നു. ഇന്റര്പോളിന്റെ സഹായം തേടിയ കേരള പോലീസ് ലുക്കൗട്ട് നോട്ടിസും പുറപ്പെടുവിച്ചു. ഇന്റര്പോള് റെഡ് കോര്ണര് നോട്ടിസ് പുറപ്പടുവിച്ചതോടെ സൗദി ഇന്റര്പോള് ഇയാളെ അറസ്റ്റ് ചെയ്ത് ജയിലിലാക്കുകയായിരുന്നു.
കേരള പോലീസ് ഉദ്യോഗസ്ഥരായ മണ്ണാര്ക്കാട് ഡിവൈ.എസ്.പി സുന്ദരന്, എസ്പി പോലീസ് ഓഫീസര് നൗഷാദ്, സിപിഒ റംഷാദ് എന്നിവരാണ് യുവാവിനെപിടികൂടാന് റിയാദില് എത്തിയത്. പ്രതിയെ സൗദി പോലീസ് കഴിഞ്ഞ ദിവസം രാത്രി എയര് ഇന്ത്യ എക്സ്പ്രസ് വിമാനത്തില് എത്തിച്ചു നല്കുകയായിരുന്നു.
ഫോട്ടോ: കേരളത്തില്നിന്നു റിയാദിലെത്തിയ പോലീസ് ഉദ്യോഗസ്ഥര്.
Related News
