തിരുവനന്തപുരം: 2026-27 അധ്യയനവര്ഷം മുതല് സംസ്ഥാനത്ത് ഒന്നാംക്ലാസ് പ്രവേശന പ്രായം ആറുവയസാക്കുമെന്ന് വിദ്യാഭ്യാസമന്ത്രി വി ശിവന്കുട്ടി അറിയിച്ചു. കേരളത്തില് നിലവില് ഒന്നാംക്ലാസിലേക്കുള്ള പ്രവേശ പ്രായം അഞ്ചുവയസാണ്. ശാസ്ത്രീയമായ പഠനങ്ങള് ആറുവയസാണ് നിര്ദേശിക്കുന്നതെന്നും അതുകൊണ്ട് അടുത്ത അധ്യയനവര്ഷം മുതല് ആറു വയസാക്കുന്ന കാര്യം സജീവ പരിഗണനയിലാണെന്ന് വിദ്യാഭ്യാസമന്ത്രി വാര്ത്താ സമ്മേളനത്തില് പറഞ്ഞു.
വികസിത രാജ്യങ്ങളെല്ലാം ഔപചാരിക വിദ്യാഭ്യാസ പ്രവേശന പ്രായം ആറ് വയസ്സോ അതിന് മുകളിലോ ആണ്. പക്ഷേ കേരളീയ സമൂഹം കാലങ്ങളായി കുട്ടികളെ അഞ്ച് വയസ്സിലാണ് ഒന്നാം ക്ലാസ്സില് ചേര്ക്കുന്നത്. ഇതില് മാറ്റം വരേണ്ടെതുണ്ടെന്ന് മന്ത്രി പറഞ്ഞു.
2009ലെ വിദ്യാഭ്യാസ അവകാശ നിയമപ്രകാരം ഒന്നാം ക്ലാസ് പ്രവേശനത്തിന് കുട്ടികള്ക്ക് പരീക്ഷയോ ക്യാപ്പിറ്റേഷന് ഫീസോ വാങ്ങുന്നത് ശിക്ഷാര്ഹമാണ്. ചില വിദ്യാലയങ്ങള് ഇതു തുടരുന്നതായി ശ്രദ്ധയില്പെട്ടിട്ടുണ്ടെന്നും പരാതി ലഭിച്ചാല് നടപടി സ്വീകരിക്കുമെന്നും മന്ത്രി അറിയിച്ചു.
സമഗ്ര ഗുണമേന്മാ വിദ്യാഭ്യാസ പദ്ധതിയുടെ ഭാഗമായി ഒന്നു മുതല് പന്ത്രണ്ടാം ക്ലാസ് വരെ പരീക്ഷാ പരിഷ്കരണം നടപ്പിലാക്കും. നിരന്തര മൂല്യനിര്ണയം, ചോദ്യപേപ്പര് നിര്മാണം, പേപ്പറുകളുടെ മൂല്യനിര്ണയം, ചോദ്യപേപ്പര് തയാറാക്കുന്നതില് അധ്യാപകര്ക്കുള്ള പരിശീലനം, ചോദ്യബാങ്ക് തയാറാക്കല് എന്നിവയും ഈ വര്ഷം തന്നെ നടപ്പിലാക്കും. പുതുക്കിയ ചോദ്യപേപ്പറുകളുടെ മാതൃകയും എസ്സിഇആര്ടി തയാറാക്കി പ്രസിദ്ധീകരിക്കുമെന്നും മന്ത്രി പറഞ്ഞു.
Related News
