റിയാദ്: പരിശുദ്ധിയുടെ പുണ്യദിനങ്ങളെ കൂടുതല്‍ ധന്യമാക്കി അലിഫ് ഇന്റര്‍നാഷണല്‍ സ്‌കൂള്‍ സംഘടിപ്പിച്ച ആറാമത് എഡിഷന്‍ ഖുര്‍ആന്‍ മുസാബഖയുടെ ഗ്രാന്‍ഡ് ഫൈനല്‍ മത്സരങ്ങള്‍ക്ക് ഉജ്ജ്വല പരിസമാപ്തി. ഗ്രാന്റ് ഫൈനല്‍ പ്രമുഖ ഇസ്ലാമിക പണ്ഡിതനും വിദ്യാഭ്യാസ വിചക്ഷണനുമായ അമ്മാര്‍ ഇബ്‌നു നാസര്‍ അല്‍ ഹുസൈന്‍ ഉദ്ഘാടനം ചെയ്തു.

ഇസ്ലാമിക് ഡിപ്പാര്‍ട്ട്‌മെന്റിന് കീഴില്‍ എല്ലാ റമദാനിലും സംഘടിപ്പിക്കുന്ന വാര്‍ഷിക ഖുര്‍ആന്‍ പാരായണ മത്സരമാണ് ഖുര്‍ആന്‍ മുസാബഖ. ഖുര്‍ആനിക സൂക്തങ്ങള്‍ നിയമാനുസൃതമായി പാരായണം ചെയ്യുന്നതിനുള്ള ശാസ്ത്രീയ പരിശീലനവും പ്രത്യേക മാര്‍ഗനിര്‍ദ്ദേശവും ലഭിച്ച ഇരുപത് മത്സരാര്‍ത്ഥികളാണ് ആറാമത് എഡിഷന്‍ ഗ്രാന്‍ഡ് ഫൈനലില്‍ പങ്കെടുത്തത്.

ഫെബ്രുവരി, മാര്‍ച്ച് മാസങ്ങളിലായി നടന്ന ഒന്നാം റൗണ്ടിലും രണ്ടാം റൗണ്ടിലും വിജയിച്ച് യോഗ്യത നേടിയ മത്സരാര്‍ത്ഥികള്‍ ഗ്രാന്റ് ഫൈനലില്‍ നാല് വിഭാഗങ്ങളിലായാണ് മത്സരിച്ചത്. സ്വബരീ അഹ്‌മദ് അലി അല്‍ ഹറാസി, സദ്ദാം ഹസന്‍ അബ്ദു അദ്ദുര്‍വാനി എന്നിവര്‍ വിധികര്‍ത്താക്കളായി.

കാറ്റഗറി ഒന്നില്‍ മുഹമ്മദ് ഹനാന്‍ കെ എ (2 C) ഒന്നാം സ്ഥാനം നേടി. കാറ്റഗറി രണ്ടില്‍ ആയിഷ സമീഹ ഇത്ബാന്‍ (3 A) വിജയിയായി. ഉമ്മു അയ്മന്‍ (6 A), ഷുഹൈബ് ഹസ്സന്‍ (6 F) എന്നിവര്‍ കാറ്റഗറി മൂന്നിലും ആയിഷാ ലാമിയ (8 A)കാറ്റഗറി നാലിലും ചാമ്പ്യന്മാരായി.

പരിപാടിയില്‍ അലിഫ് ഗ്രൂപ്പ് ഓഫ് സ്‌കൂള്‍സ് സി ഇ ഒ ലുഖ്മാന്‍ അഹമ്മദ് അധ്യക്ഷത വഹിച്ചു. ഹെഡ്മാസ്റ്റര്‍ നൗഷാദ് നാലകത്ത്, ഖുര്‍ആന്‍ മുസാബഖ കോഡിനേറ്റര്‍ മുഹമ്മദ് ആസിഫ് എന്നിവര്‍ സംബന്ധിച്ചു. അഡ്മിനിസ്‌ട്രേറ്റര്‍ അലി ബുഖാരി സ്വാഗതവും സല്‍മാന്‍ മുഹ്‌യിദ്ദീന്‍ നന്ദിയും പറഞ്ഞു.

ഫോട്ടോ: അലിഫ് സ്‌കൂള്‍ സംഘടിപ്പിച്ച ആറാമത് എഡിഷന്‍ ഖുര്‍ആന്‍ മുസാബഖ അമ്മാര്‍ ഇബ്‌നു നാസര്‍ അല്‍ ഹുസൈന്‍ ഉദ്ഘാടനം ചെയ്യുന്നു.