തിരുവനന്തപുരം: രണ്ടു ദിവസത്തിനകം സര്‍വീസില്‍നിന്നു വിരമിക്കാനിരുന്ന എസ്.ഐ തൂങ്ങി മരിച്ച നിലയില്‍. എആര്‍ ക്യാമ്പിലെ എസ്ഐ റാഫി (56) ആണ് മരിച്ചത്. ചിറയിന്‍കീഴ് അഴൂരിലെ ഒഴിഞ്ഞുകിടക്കുന്ന കുടുംബവീട്ടില്‍ ശനിയാഴ്ച പുലര്‍ച്ചെയാണ് റാഫിയെ മരിച്ച നിലയില്‍ കണ്ടെത്തിയത്. തിരുവനന്തപുരം തൈക്കാട് മേട്ടുക്കടയിലാണ് റാഫിയും കുടുംബവും താമസിച്ചിരുന്നത്. ഇന്നലെ വൈകിട്ട് അഴൂരിലെ കുടുംബവീട്ടില്‍ പോയിവരാമെന്നു പറഞ്ഞാണ് റാഫി തൈക്കാട്ടുനിന്ന് പോയത്. ഇന്നു പുലര്‍ച്ചെ അയല്‍വാസികളാണ് റാഫിയുടെ മൃതദേഹം കണ്ടത്. ആത്മഹത്യയാണെന്നാണ് പ്രാഥമിക നിഗമനം. ഭാര്യയും രണ്ടു മക്കളുമുണ്ട്.

മാര്‍ച്ച് 31ന് സര്‍വീസില്‍നിന്നു വിരമിക്കാനിരിക്കുകയായിരുന്നു റാഫി. സാമ്പത്തിക ബാധ്യതയാകാം ആത്മഹത്യക്കു കാരണമെന്നാണ് നിഗമനം. പോലീസ് സൊസൈറ്റിയില്‍നിന്ന് എടുത്ത വായ്പ തിരിച്ചടച്ചിരുന്നില്ല. ഇതില്‍ ജാമ്യക്കാരില്‍നിന്നു പണം തിരികെ പിടിക്കാനുള്ള നടപടി ആരംഭിച്ചിരുന്നെന്നും ഇതുമൂലം ഉണ്ടായ മനോവിഷമം ആത്മഹത്യയിലേക്കു നയിച്ചതാകാമെന്നു കരുതുന്നു. പോലീസ് അന്വേഷിച്ചു വരുന്നു.