തിരുവനന്തപുരം: എമ്പുരാന് കാണുമെന്ന് ഞാന് പറഞ്ഞിരുന്നു, പക്ഷേ ഇനി ഞാന് കാണില്ലെന്ന് ബി.ജെ.പി സംസ്ഥാന അധ്യക്ഷന് രാജീവ് ചന്ദ്രശേഖര്. സത്യം വളച്ചൊടിച്ച് ഒരു കഥ കെട്ടിപ്പടുക്കാന് ശ്രമിക്കുന്ന ഏതൊരു സിനിമയും പരാജയപ്പെടുക തന്നെ ചെയ്യുമെന്നും ഇത്തരത്തിലുള്ള സിനിമാ നിര്മ്മാണത്തില് താന് നിരാശനാണെന്നും അദ്ദേഹം കൂട്ടിച്ചേര്ത്തു. എമ്പുരാന് സിനിമക്കെതിരെ സംഘപരിവാറിന്റെ പ്രതിഷേധവും ഭീഷണിയും കടുത്തതോടെയാണ് തന്റെ പഴയ നിലപാടില്നിന്ന് രാജീവ് ചന്ദ്രശേഖര് പിന്നോട്ടു പോയത്. സിനിമയെ സിനിമയായി കാണണമെന്ന നിലപാടുമായായിരുന്നു സംഘ്പരിവാര് പ്രതിഷേധം നിലനില്ക്കെതന്നെ സിനിമ കാണുമെന്ന് അദ്ദേഹം പറഞ്ഞത്. എന്നാല് പ്രതിഷേധം കനത്തതോടെ അദ്ദേഹം ഫേസ്ബുക്കിലൂടെ തന്റെ നിലപാട് മാറ്റം വ്യക്തമാക്കുകയായിരുന്നു.
ഫേസ്ബുക്ക് കുറിപ്പിന്റെ പൂര്ണ രൂപം:
ലൂസിഫര് കണ്ടിരുന്നു, എനിക്ക് അത് ഇഷ്ടപ്പെട്ടു. ലൂസിഫറിന്റെ തുടര്ച്ചയാണെന്ന് കേട്ടപ്പോള് എമ്പുരാന് കാണുമെന്ന് ഞാന് പറഞ്ഞിരുന്നു.
എന്നാല് ഇപ്പോള് സിനിമയുടെ നിര്മ്മാതാക്കള് തന്നെ സിനിമയില് 17 ഭേദഗതികള് വരുത്തിയിട്ടുണ്ടെന്നും ചിത്രം വീണ്ടും സെന്സര്ഷിപ്പിന് വിധേയമാകുന്നുണ്ടെന്നും എനിക്ക് മനസ്സിലായി. മോഹന്ലാല് ആരാധകരെയും മറ്റ് പ്രേക്ഷകരെയും അസ്വസ്ഥരാക്കുന്ന വിഷയങ്ങള് സിനിമയിലുണ്ടെന്ന് എനിക്ക് മനസ്സിലായി.
ഒരു സിനിമയെ ഒരു സിനിമയായി കാണണം. അതിനെ ചരിത്രമായി കാണാന് കഴിയില്ല. സത്യം വളച്ചൊടിച്ച് ഒരു കഥ കെട്ടിപ്പടുക്കാന് ശ്രമിക്കുന്ന ഏതൊരു സിനിമയും പരാജയപ്പെടുക തന്നെ ചെയ്യും.
അപ്പോള്, ലൂസിഫറിന്റെ ഈ തുടര്ച്ച ഞാന് കാണുമോ?- ഇല്ല.
ഇത്തരത്തിലുള്ള സിനിമാനിര്മ്മാണത്തില് ഞാന് നിരാശനാണോ? - അതെ.
Related News
