തിരുവനന്തപുരം: മുഖ്യമന്ത്രി പിണറായി വിജയന്, മുസ്്ലിം ലീഗ് അധ്യക്ഷന് പാണക്കാട് സാദിഖലി ശിഹാബ് തങ്ങള്, ഇന്ത്യന് ഗ്രാന്റ് മുഫ്തി കാന്തപുരം എ പി അബൂബക്കര് മുസ്ലിയാര് തുടങ്ങിയവര് ഈദ് ആശംസ നേര്ന്നു. സ്നേഹത്തിന്റെയും ത്യാഗത്തിന്റെയും സന്ദേശം ഉയര്ത്തിപ്പിടിച്ച ഒരു റമദാന് കാലമാണ് കഴിഞ്ഞുപോയതെന്ന് മുഖ്യമന്ത്രി പിണറായി വിജയന് ഈദ് സന്ദേശത്തില് പറഞ്ഞു. മറ്റുള്ളവരുടെ ദുഃഖങ്ങളിലും ക്ലേശങ്ങളിലും സാന്ത്വനസ്പര്ശമായി മാറുന്ന ഉന്നതമായ മാനവികതയുടേതാണ് റമദാന്. വേര്തിരിവുകളില്ലാതെ ലോകമെമ്പാടുമുള്ളവര് ഈദ് ആഘോഷങ്ങളില് പങ്കുചേരുകയാണ്. പരസ്പര വിശ്വാസത്തിലും സഹോദര്യത്തിലുമൂന്നിയ സാമൂഹിക ബന്ധങ്ങളുടെ തിളക്കമാണ് ഈ ആഘോഷങ്ങളുടെ പ്രധാന സവിശേഷതയെന്ന് കാണാം.
വൈവിധ്യങ്ങളുടെ സമ്പന്നതയെ ഭയക്കുന്ന വെറുപ്പിന്റെ രാഷ്ട്രീയം ഇന്ന് ലോകത്തെങ്ങും വര്ഗീയതയുടെ വിഷവിത്തുകള് വിതയ്ക്കുകയാണ്. ആളുകളെ ഭിന്നിപ്പിച്ചും തമ്മിലടിപ്പിച്ചും വിലകുറഞ്ഞ രാഷ്ട്രീയ നേട്ടങ്ങളുണ്ടാക്കാന് ശ്രമിക്കുന്ന പ്രതിലോമ ശക്തികളെ മനുഷ്യത്വത്തിന്റെയും മൈത്രിയുടെയും കൈകോര്ക്കലുകളിലൂടെ ചെറുക്കേണ്ടതുണ്ട്. ഈ ചെറിയ പെരുന്നാള് ദിനം ഒരുമയുടെ വലിയ ആഘോഷമായി മാറട്ടെയെന്നും മുഖ്യമന്ത്രി ആശംസിച്ചു.
വ്രതാനുഷ്ഠാനംകൊണ്ട് കൈവരിച്ച ആത്മശുദ്ധിയുടെയും ആത്മസമര്പ്പണത്തിലൂടെ നേടിയെടുത്ത ചൈതന്യത്തിന്റെയും സന്തോഷ പ്രഖ്യാപന ആഘോഷമാണ് ഇദുല് ഫിത്റെന്നും പാര്ശ്വവത്കരിക്കപ്പെട്ടവരെ ഹൃദയത്തോട് ചേര്ക്കണമെന്നും പാണക്കാട് സാദിഖലി ശിഹാബ് തങ്ങള് ഈദ് സന്ദേശത്തില് പറഞ്ഞു. കെട്ടുകാഴ്ചകള്ക്കപ്പുറം സ്വന്തത്തിലേക്കും കുടുംബത്തിലേക്കും സമൂഹത്തിലേക്കും അകംതുറന്ന് നോക്കാനുള്ള അവസരമാണിത്. മദ്യത്തിലും ലോട്ടറി പോലുള്ള ചൂതാട്ടത്തിലും മുഖ്യ വരുമാനങ്ങള് കാണുന്ന ഭരണകൂടങ്ങള് നിയമപരമായ ബാധ്യതകളും നിയമവാഴ്ചയും ഉറപ്പാക്കുന്നതോടൊപ്പം ലഹരിമുക്ത രാജ്യമെന്ന ഇന്ത്യന് ഭരണഘടനയുടെ മാര്ഗനിര്ദേശക ലക്ഷ്യത്തോട് ചേര്ന്നുനില്ക്കാനും പരിശ്രമിക്കണമെന്ന് സാദിഖലി തങ്ങള് പറഞ്ഞു.
ലഹരിയുപയോഗം, അക്രമ സംഭവങ്ങള് നാട്ടില് വ്യാപകമായിത്തുടങ്ങിയ കാലത്ത് ശരീരത്തെയും മനസ്സിനെയും നശിപ്പിക്കുന്ന എല്ലാവിധ ലഹരികളില് നിന്ന് മാറി നില്ക്കാനും പരസ്പര സ്നേഹവും നന്മയും കൈമാറ്റം ചെയ്യുന്ന പ്രവൃത്തികള് ജീവിതലഹരിയായി സ്വീകരിക്കാനും എല്ലാവരും തയ്യാറാവണമെന്ന് ഇന്ത്യന് ഗ്രാന്റ് മുഫ്തി കാന്തപുരം എ പി അബൂബക്കര് മുസ്ലിയാര് ചെറിയ പെരുന്നാള് സന്ദേശത്തില് പറഞ്ഞു. വിശുദ്ധിയുടെ ആഘോഷമാണ് ചെറിയപെരുന്നാള്. ഒരു മാസം നീണ്ട വ്രതാനുഷ്ഠാനത്തിലൂടെ തെളിച്ചമുള്ള ഹൃദയവുമായാണ് വിശ്വാസികള് പെരുന്നാളിനെ വരവേല്ക്കുന്നത്. നോമ്പുകാലത്ത് ശീലിച്ച ജീവിത ചിട്ടകളും ധാര്മിക മൂല്യങ്ങളും വരും കാലത്തുടനീളം പുലര്ത്തണമെന്ന പ്രതിജ്ഞയെടുക്കേണ്ടത് ഈ അവസരത്തില് പ്രധാനമാണ്.
ഫിത്വര് സകാത്ത് ഉള്പ്പെടെയുള്ള നിര്ബന്ധ കര്മങ്ങള്ക്കൊപ്പം കുടുംബ സന്ദര്ശനം, ദാന ധര്മം, അയല്പക്ക ബന്ധം എന്നിവ ശക്തിപ്പെടുത്താനും ചുറ്റുമുള്ള പാവപ്പെട്ടവര്ക്കും രോഗികള്ക്കും വിധവകകള്ക്കും കാരുണ്യമെത്തിക്കാനും പെരുന്നാള് ദിവസം ഉത്സാഹിക്കണം. ഏവരും സന്തോഷിക്കുന്ന പെരുന്നാള് ദിനത്തില് നമുക്കുചുറ്റും പ്രയാസപ്പെടുന്ന ആരുമില്ലെന്ന് ഉറപ്പുവരുത്തുകയും ഉണ്ടെങ്കില് ആവശ്യമായത് നല്കുകയും വേണം. ഗാസ ഉള്പ്പെടെ ഈ സമയത്തും ലോകത്ത് ബുദ്ധിമുട്ടനുഭവിക്കുന്ന ജനതയുടെ ക്ഷേമത്തിനായി ഏവരും പ്രാര്ഥിക്കുകയും വേണം. ഏവര്ക്കും സന്തോഷത്തിന്റെ ചെറിയ പെരുന്നാള് ആശംസകള് നേരുന്നതായി സന്ദേശത്തില് പറഞ്ഞു.
Related News
