കൊച്ചി: കൊച്ചി കായലിലേക്ക് മാലിന്യപ്പൊതി വലിച്ചെറിഞ്ഞതിന്റെ പേരില്‍ പ്രശസ്ത ഗായകന്‍ എം ജി ശ്രീകുമാര്‍ 25,000 രൂപ പിഴ ഒടുക്കി. എം ജി ശ്രീകുമാറിന്റെ മുളവുകാട് പഞ്ചായത്തിലുളള വീട്ടില്‍ നിന്നൊരു മാലിന്യപ്പൊതി വീഴുന്നത് മൊബൈല്‍ ഫോണില്‍ പകര്‍ത്തിയ വിനോദ സഞ്ചാരിയുടെ വീഡിയോ പുറത്തുവന്നതാണ് പിഴ ഒടുക്കാന്‍ നോട്ടീസ് ലഭിക്കാനും തുടര്‍ന്ന് ശ്രീകുമാര്‍ പിഴ നല്‍കാനും കാരണമായത്.

മാലിന്യപ്പൊതി കായലിലേക്ക് വലിച്ചെറിഞ്ഞുവെന്നതിന്റെ പേരില്‍ പിഴയായി 25,000 രൂപ അടയ്ക്കണമെന്നായിരുന്നു പഞ്ചായത്ത് അധികൃതരുടെ നോട്ടീസ്. നാലു ദിവസം മുന്‍പ് സോഷ്യല്‍ മീഡിയയിലൂടെ മന്ത്രി എം ബി രാജേഷിനെ ടാഗ് ചെയ്ത്് മാലിന്യം വലിച്ചെറിയുന്നത് ചിത്രീകരിച്ചുള്ള വിഡിയോ പുറത്തു വന്നിരുന്നു. സംഭവത്തില്‍ മന്ത്രി പ്രതികരിക്കുകയും വിഡിയോ ദൃശ്യവും ദിവസവും സമയവും സ്ഥലവും പരിശോധിച്ച് പഞ്ചായത്ത് അധികൃതര്‍ സംഭവം ശരിയാണെന്ന് ബോധ്യമാവുകയും ചെയ്തതോടെയാ നോട്ടിസ് നല്‍കിയത്. എം ജി ശ്രീകുമാറിന്റെ വീട്ടില്‍ നിന്നാണ് മാലിന്യം വലിച്ചെറിയുന്നതെന്ന് വിഡിയോയില്‍ വ്യക്തമാണെങ്കിലും ആരാണ് ചെയ്തതെന്ന് വ്യക്തമല്ല.

പൊതുസ്ഥലത്ത് മാലിന്യം വലിച്ചെറിയുന്നതുമായി ബന്ധപ്പെട്ട പരാതികള്‍ അറിയിക്കാനുള്ള 94467 00800 എന്ന സര്‍ക്കാരിന്റെ വാട്‌സാപ് നമ്പറിലേക്ക് തെളിവു സഹിതം പരാതി നല്‍കിയാല്‍ ആരായാലും നടപടി ഉണ്ടാകുമെന്ന് മന്ത്രി വ്യക്തമാക്കി.