കോഴിക്കോട്: വഖഫ് ഭേദഗതി ബില്ലിനെതിരെ രാഷ്ട്രീയ, നിയമ പോരാട്ടം തുടരാന് മുസ്ലിം ലീഗിന്റെ ദേശീയ നേതൃയോഗം തീരുമാനിച്ചു. രാജ്യസഭയിലും ബില് പാസായതിനെ തുടര്ന്ന് ചേര്ന്ന അടിയന്തര നേതൃയോഗം പൊളിറ്റിക്കല് അഡൈ്വസറി കമ്മിറ്റി ചെയര്മാന് പാണക്കാട് സയ്യിദ് സാദിഖലി ശിഹാബ് തങ്ങള് ഉദ്ഘാടനം ചെയ്തു. ബില്ലിനെതിരെ ദേശീയ തലത്തില് പ്രക്ഷോഭങ്ങള് സംഘടിപ്പിക്കാനും ബില്ലിന്റെ ഭരണഘടനാ വിരുദ്ധത ചൂണ്ടിക്കാട്ടി സുപ്രിം കോടതിയെ സമീപിക്കാനും യോഗം തീരുമാനിച്ചു. ഏപ്രില് 16ന് കോഴിക്കോട്ട് വഖഫ് സംരക്ഷണ മഹാറാലി സംഘടിപ്പിക്കും.
ഡല്ഹിയിലും മറ്റ് ഉത്തരേന്ത്യന് സംസ്ഥാനങ്ങളിലും പ്രക്ഷോഭ പരിപാടികള് സംഘടിപ്പിക്കാനും യോഗം തീരുമാനിച്ചു. ദേശീയ തലത്തില് ഓരോ സംസ്ഥാനത്തും നടക്കുന്ന പ്രക്ഷോഭങ്ങളുടെ തീയതി അതത് സംസ്ഥാന കമ്മിറ്റികള് കൂടി തീരുമാനിച്ച് പ്രഖ്യാപിക്കും. മതസ്വാതന്ത്ര്യത്തിന്റെ നഗ്നമായ ലംഘനമാണ് ബില്ലിലൂടെ സര്ക്കാര് നടപ്പാക്കിയത് എന്ന് യോഗം വിലയിരുത്തി. ഇത് ചൂണ്ടിക്കാട്ടി അടിയന്തരമായി സുപ്രിം കോടതിയെ സമീപിക്കാന് പാര്ട്ടി തീരുമാനിച്ചത്. ഇതിനായി ദേശീയ ജനറല് സെക്രട്ടറി പി.കെ കുഞ്ഞാലിക്കുട്ടിയെയും പാര്ട്ടി എംപിമാരെയും ചുമതലപ്പെടുത്തി.
രണ്ടാം മോദി സര്ക്കാറിന്റെ കാലത്ത് കൊണ്ടുവന്ന സിഎഎക്ക് സമാനമായ നിയമമാണ് മൂന്നാം മോദി സര്ക്കാരിന്റെ വഖഫ് ബില്ലെന്ന് സാദിഖലി തങ്ങള് പറഞ്ഞു. മതേതര ജനാധിപത്യ ശക്തികളെ ചേര്ത്ത് നിര്ത്തിക്കൊണ്ടുള്ള വമ്പിച്ച ബഹുജന സമരം ഇതിനെതിരെ ഉയര്ന്നുവരുമെന്ന് യോഗം പ്രഖ്യാപിച്ചു. മുസ്ലിംകളുടെ മതസ്വാതന്ത്ര്യത്തിനെതിരെയാണ് കേന്ദ്ര സര്ക്കാര് ഇന്ന് കടന്നു കയറുന്നത്, നാളെ മറ്റു മത ന്യൂനപക്ഷള്ക്ക് നേരെ ഇതാവര്ത്തിക്കും. വഖഫ് ബില്ലിന് തൊട്ടുപിന്നാലെ പാതിരാവില് മണിപ്പൂരിലെ രാഷ്ട്രപതി ഭരണത്തിനുള്ള നിയമവും പാസാക്കിയെടുത്തു എന്നത് ശ്രദ്ധേയമാണ്. നൂറു കണക്കിനാളുകള് കൊല്ലപ്പെടുകയും ക്രൈസ്തവ ആരാധനാലയങ്ങള് അഗ്നിക്കിരയാക്കുകയും ചെയ്ത മണിപ്പൂരിലേക്ക് തിരിഞ്ഞു നോക്കാത്ത പ്രധാനമന്ത്രിയുടെ ക്രൈസ്തവ സ്നേഹത്തിന്റെ കാപട്യം തിരിച്ചറിയാനുള്ള വിവേകം ആ സമൂഹത്തിനുണ്ട്. പൗരത്വ സമരത്തിന് സമാനമായ ജനകീയ പ്രക്ഷോഭത്തിനാണ് രാജ്യം സാക്ഷ്യം വഹിക്കാന് പോകുന്നതെന്നും മുസ്ലിം ലീഗ് ഇതിന്റെ മുന്നിലുണ്ടാകുമെന്നും യോഗം പ്രഖ്യാപിച്ചു.
ദേശീയ ഓര്ഗനൈസിങ് സെക്രട്ടറി ഇ.ടി മുഹമ്മദ് ബഷീര് എംപി, ട്രഷറര് പി.വി അബ്ദുല് വഹാബ് എംപി, സീനിയര് വൈസ് പ്രസിഡന്റ് അബ്ദുസമദ് സമദാനി എംപി, ഡോ. എം.കെ മുനീര് എംഎല്എ, നവാസ് കനി എംപി, ഹാരിസ് ബീരാന് എംപി, ദസ്തഗീര് ആഗ, ഖുര്റം അനീസ് ഉമര്, സി.കെ സുബൈര് എന്നിവര് ചര്ച്ചയില് പങ്കെടുത്തു.
Related News
