മധുര: മധുരയില്‍ ചേര്‍ന്ന 24ാം പാര്‍ട്ടി കോണ്‍ഗ്രസ് സി.പി.എം ദേശീയ ജനറല്‍ സെക്രട്ടറിയായി എം.എ. ബേബിയെ തെരഞ്ഞെടുത്തു. ഇ.എം.എസ് നമ്പൂതിരിപ്പാടിന് ശേഷം ഈ പദവിയിലെത്തുന്ന ആദ്യ മലയാളിയാണ് എം.എ ബേബി. 2012ലെ കോഴിക്കോട് പാര്‍ട്ടി കോണ്‍ഗ്രസിലാണ് ബേബി പി.ബി അംഗമായത്.

പുതിയ കേന്ദ്രകമ്മിറ്റിയുടെ ആദ്യയോഗമാണ് ജനറല്‍ സെക്രട്ടറിയെയും 18 അംഗ പൊളിറ്റ് ബ്യൂറോയേയും തെരഞ്ഞെടുത്തത്. 85 അംഗ കേന്ദ്ര കമ്മിറ്റിയാണുള്ളത്. 84 പേരെ തെരഞ്ഞെടുത്തു. ഒരു സ്ഥാനം ഒഴിച്ചിട്ടു. കേന്ദ്ര കമ്മിറ്റി അംഗങ്ങളില്‍ 20 ശതമാനം സ്ത്രീകളാണ്. കൂടാതെ, പുതിയ കേന്ദ്ര കമ്മിറ്റി 18 അംഗ പൊളിറ്റ് ബ്യൂറോയെ തെരഞ്ഞെടുത്തു. കേന്ദ്ര കമ്മിറ്റിയില്‍ 30 പേര്‍ പുതുമുഖങ്ങളാണ്. ഏഴു പേര്‍ പ്രത്യേക ക്ഷണിതാക്കള്‍. ആറംഗ സെന്‍ട്രല്‍ കണ്‍ട്രോള്‍ കമീഷനെയും തെരഞ്ഞെടുത്തു. പിബിയില്‍ എട്ട് പേര്‍ പുതുമുഖങ്ങളാണ്.

പിബി അംഗം മുഹമ്മദ് സലീം ജനറല്‍ സെക്രട്ടറി സ്ഥാനത്തേക്ക് എം എ ബേബിയുടെ പേര് നിര്‍ദ്ദേശിച്ചു. അശോക് ധാവ്‌ളെ പിന്താങ്ങി. പാര്‍ടി കോണ്‍ഗ്രസ് എം എ ബേബിയെ സെക്രട്ടറിയായി തെരഞ്ഞെടുത്തതായി പിണറായി വിജയന്‍ സമ്മേളനത്തെ അറിയ

പിണറായി വിജയന്‍, ബി.വി. രാഘവലു, എം.എ. ബേബി, തപന്‍ സെന്‍, നിലോത്പാല്‍ ബസു, മുഹമ്മദ് സലിം, എ. വിജയരാഘവന്‍, അശോക് ദാവ് ലെ, രാമചന്ദ്ര ദോം, എം.വി. ഗോവിന്ദന്‍, അംറ റാം, വിജു കൃഷ്ണന്‍, മറിയം ദാവ് ലെ, യു. വാസുകി, കെ. ബാലകൃഷ്ണന്‍, ജിതേന്ദ്ര ചൗധരി, ശ്രിദീപ് ഭട്ടാചാര്യ, അരുണ്‍ കുമാര്‍ എന്നിവരാണ് പി.ബി. അംഗങ്ങള്‍. ഇവരില്‍ എട്ടു പേര്‍ പുതുമുഖങ്ങളാണ്.

പ്രകാശ് കാരാട്ടിന്റെയും കേരള ഘടകത്തിന്റെ പൂര്‍ണ പിന്തുണയും ജനറല്‍ സെക്രട്ടറി സ്ഥാനത്തേക്ക് എം.എ. ബേബിക്ക് ലഭിച്ചു. ജനറല്‍ സെക്രട്ടറി സ്ഥാനത്തേക്കുള്ള എം.എ ബേബിയുടെ പേരിനെ എതിര്‍ത്തിരുന്ന ബംഗാള്‍ ഘടകം ഒടുവില്‍, പിന്മാറുകയായിരുന്നു. ഏറെക്കാലമായി ഡല്‍ഹി കേന്ദ്രീകരിച്ച് പ്രവര്‍ത്തിക്കുന്ന നേതാവാണ് എം.എ. ബേബി. പാര്‍ലമെന്ററി പരിചയവും സംഘടനാ തലത്തിലെ മികവും ബേബിക്ക് അനുകൂലമായി. തമിഴ്‌നാട്, കര്‍ണാടക, രാജസ്ഥാന്‍ തുടങ്ങിയ സംസ്ഥാനങ്ങളില്‍ നിന്നുള്ള നേതാക്കള്‍ ബേബിയെ ജനറല്‍ സെക്രട്ടറിയാക്കണമെന്ന അഭിപ്രായത്തില്‍ ഉറച്ച് നിന്നു.

കേരള സ്റ്റുഡന്റ്‌സ് ഫെഡറേഷനിലൂടെയാണ് എം.എ. ബേബി രാഷ്ട്രീയ പ്രവര്‍ത്തനം തുടങ്ങിയത്. 1974ല്‍ എസ്.എഫ്.ഐ സെന്‍ട്രല്‍ എക്‌സിക്യൂട്ടീവ് കമ്മിറ്റിയിലെ ഏറ്റവും പ്രായംകുറഞ്ഞ അംഗമായി തെരഞ്ഞെടുക്കപ്പെട്ടു. 1975ല്‍ എസ്.എഫ്.ഐ കേരള ഘടകം പ്രസിഡന്റായി. 1979ല്‍ അഖിലേന്ത്യ പ്രസിഡന്റായി. 1987ല്‍ ഡി.വെ.എഫ്.ഐ 1977ല്‍ സി.പി.എം കൊല്ലം ജില്ലാ കമ്മിറ്റിയംഗം.1984ല്‍ സി.പി.എം കേരള സംസ്ഥാന കമ്മിറ്റിയംഗം. 1989ല്‍ സി.പി.എം കേന്ദ്ര കമ്മിറ്റിയംഗം. 1992ല്‍ സി.പി.എം കേന്ദ്ര സെക്രട്ടറിയറ്റംഗം, 1997ല്‍ സി.പി.എം സംസ്ഥാന സെക്രട്ടറിയറ്റംഗം.അഖിലേന്ത്യ പ്രസിഡന്റായി.


2015 ലെ വിശാഖപട്ടണം പാര്‍ട്ടി കോണ്‍ഗ്രസ് മുതല്‍ മൂന്നു തവണ സീതാറാം യെച്ചൂരിയായിരുന്നു ജനറല്‍ സെക്രട്ടറി. 2018 ല്‍ ഹൈദരബാദിലും 2022 ല്‍ കണ്ണൂരിലുമാണ് പാര്‍ട്ടി കോണ്‍ഗ്രസ് ചേര്‍ന്നത്. കഴിഞ്ഞ വര്‍ഷം യെച്ചൂരിയുടെ അകാല മരണത്തിന് പിന്നാലെ പ്രകാശ് കാരാട്ട് പോളിറ്റ് ബ്യൂറോ കോഡിനേറ്ററായി ചുമതലയേറ്റു. ഇതിനു പിന്നാലെയാണ് ഇരുപത്തിനാലാം പാര്‍ട്ടി കോണ്‍ഗ്രസില്‍ എംഎ ബേബി പാര്‍ട്ടി ജനറല്‍ സെക്രട്ടറി സ്ഥാനത്ത് എത്തുന്നത്.