കോട്ടയം: അമിത ജോലിഭാരം താങ്ങാനാവാതെ യുവാവ് ഫ്‌ളാറ്റില്‍നിന്ന് ചാടി മരിച്ചു. എറണാകുളത്തെ സ്വകാര്യ ഐ.ടി കമ്പനി ജീവനക്കാരന്‍ പത്തനംതിട്ട മല്ലപ്പള്ളി പുന്നവേലി ചീരംകുളം ഇട്ടിക്കല്‍ ജേക്കബ് തോമസിനെയാണ് (23) മുട്ടമ്പലം സ്‌കൈലൈന്‍ ഫ്‌ലാറ്റില്‍നിന്ന് വീണ് മരിച്ചനിലയില്‍ കണ്ടെത്തിയത്. ഞായറാഴ്ച പുലര്‍ച്ചയാണ് സംഭവം. ഐ.ടി കമ്പനിയിലെ ജോലിക്കാരനായ യുവാവ് അമിത ജോലി സമ്മര്‍ദത്തിലായിരുന്നുവെന്നും രാത്രി ഏറെ വൈകിയും ജോലി ചെയ്തിരുന്നതായും ബന്ധുക്കള്‍ പറയുന്നു.

പുലര്‍ച്ചെ രണ്ടിന് മാതാവിന്റെ മൊബൈലിലേക്ക് താന്‍ ഫ്‌ലാറ്റില്‍നിന്ന് ചാടാന്‍ പോകുന്നുവെന്ന വിഡിയോ സന്ദേശം അയച്ചിരുന്നു. ഉറക്കത്തിലായതിനാല്‍ അമ്മ സന്ദേശം കണ്ടിരുന്നില്ല. പുലര്‍ച്ച അഞ്ചരയോടെ എഴുന്നേറ്റപ്പോള്‍ മകനെ കാണാഞ്ഞതിനെത്തുടര്‍ന്ന് അന്വേഷിച്ചപ്പോഴാണ് ഫ്‌ലാറ്റിന് താഴെവീണ് മരിച്ച നിലയില്‍ കണ്ടെത്തിയത്. പിന്നീടാണ് ഫോണിലെ സന്ദേശം കാണുന്നത്.

പോലീസ് സ്ഥലത്തെത്തി മാതാവിന്റെയും മകന്റെയും മൊബൈല്‍ ഫോണുകളും ലാപ്‌ടോപ്പും കൊണ്ടുപോയി. നാല് മാസം മുന്‍പാണ് ജേക്കബ് തോമസ് എറണാകുളത്തെ കമ്പനിയില്‍ ജോലിക്ക് കയറിയത്. ഉറങ്ങാന്‍ പോലും സാധിക്കാത്ത രീതിയിലുള്ള ജോലി സമ്മര്‍ദ്ദം ഉണ്ടായിരുന്നതായി കുടുംബം പറയുന്നു.