പെരുമ്പാവൂര്‍: പസവത്തെ തുടര്‍ന്നു മരിച്ച യുവതിയുടെ മൃതദേഹം രഹസ്യമായി സംസ്‌കരിക്കാനുള്ള നീക്കം പോലീസ് തടഞ്ഞു. പെരുമ്പാവൂര്‍ അറയ്ക്കപ്പടി പ്ലാവിന്‍ ചുവട് കൊപ്രമ്പില്‍ കുടുംബാംഗവും മലപ്പുറം ചട്ടിപ്പറമ്പ് സിറാജ് മന്‍സിലില്‍ സിറാജുദീന്റെ ഭാര്യയുമായ അസ്മയുടെ (35) മൃതദേഹമാണ് പോലീസ് ഏറ്റെടുത്ത് പോസ്റ്റ് മോര്‍ട്ടത്തിനായി കളമശ്ശേരി മെഡിക്കല്‍ കോളേജിലേക്കു മാറ്റിയത്. മലപ്പുറം ചട്ടിപ്പറമ്പിലെ വീട്ടില്‍വച്ചാണ് അസ്മ അഞ്ചാമത്തെ കുഞ്ഞിന് ജന്മം നല്‍കിയത്.

പ്രസവാനന്തരം അസ്മക്ക് ഏറെ പ്രയാസങ്ങള്‍ ഉണ്ടായെങ്കിലും സിറാജുദ്ദീന്‍ അസ്മയെ ആശുപത്രിയില്‍ എത്തിക്കുകയോ നവജാത ശിശുവിനെ പരിചരിക്കുകയോ ചെയ്തില്ലെന്ന യുവതിയുടെ ബന്ധുക്കളുടെ പരാതിയിലാണ് പോലീസ് അസ്വാഭാവിക മരണത്തിനു കേസെടുക്കുകയും മൃതദേഹ സംസ്‌കാരണം തടയുകയും ചെയ്തത്. നവജാത ശിശുവിനെ പെരുമ്പാവൂരിലെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചു.

ശനിയാഴ്ച വൈകിട്ട് 6 ന് പ്രസവിച്ച അസ്മ, രാത്രി 9 ന് മരിച്ചു. ഈ വിവരം മണിക്കൂറുകള്‍ക്കു ശേഷമാണ് അസ്മയുടെ വീട്ടില്‍ അറിയിച്ചത്. മൃതദേഹവും നവജാതശിശുവുമായി സിറാജുദീന്‍ സുഹൃത്തുക്കള്‍ക്കൊപ്പം ആംബുലന്‍സില്‍ ഞായറാഴ്ച രാവിലെ 7 ന് യുവതിയുടെ വീട്ടില്‍ എത്തി. സിറാജുദ്ദീന്റെ നടപടിയില്ഡ രോഷാകുലരായ അസ്മയുടെ ബന്ധുക്കള്‍ വാക്കുതര്‍ക്കം ഉണ്ടാക്കുകയും അതു നേരിയ സംഘര്‍ഷത്തിലേക്കു മാറുകയും ചെയ്തു. സംഘര്‍ഷത്തില്‍ പരിക്കേറ്റ സിറാജുദ്ദീനും അസ്മയുടെ ബന്ധുക്കളായ സ്ത്രീകളും ഉള്‍പ്പെടെ 11 പേര്‍ സ്വകാര്യ ആശുപത്രിയില്‍ ചികിത്സയിലാണ്.

അക്യുപങ്ചര്‍ ബിരുദം നേടിയിട്ടുള്ളവരാണ് സിറാജുദ്ദീനും അസ്മയും. മടവൂര്‍ കാഫില എന്ന പേരില്‍ യുട്യൂബ് ചാനല്‍ നടത്തുന്ന സിറാജുദീന്‍ അമാനുഷികമായ സിദ്ധികളുള്ള വ്യക്തിയായി സ്വയം പ്രചരിപ്പിച്ചിരുന്നു. മന്ത്രവാദവും സിദ്ധവൈദ്യവും അക്യുപഞ്ചര്‍ ചികിത്സയും പ്രയോഗിച്ചത് പ്രസവ സമയത്ത് വിനയായെന്നാണ് അസ്മയുടെ ബന്ധുക്കള്‍ പറയുന്നത്. അസ്മ പ്രസവസമയത്ത് അസ്വസ്ഥത പ്രകടിപ്പിച്ചപ്പോള്‍ ഭര്‍ത്താവ് സിറാജുദ്ദീന്‍ താന്‍ പഠിച്ച ചികിസാരീതികള്‍ പ്രയോഗിക്കുകയായിരുന്നുവെന്നും അവര്‍ ആരോപിച്ചു. ഒന്നര വര്‍ഷമായി ഈസ്റ്റ് കോഡൂരില്‍ വാടകക്ക് താമസിക്കുന്ന സിറാജുദ്ദീനും കുടുംബവും ആളുകളുമായി അല്‍പം അകന്നാണ് കഴിഞ്ഞിരുന്നതെന്നും ജനുവരിയില്‍ ആരോഗ്യ പ്രവര്‍ത്തകര്‍ വീട്ടിലെത്തിയപ്പോള്‍ കൃത്യമായ വിവരം നല്‍കാതെ മടക്കിവിട്ടെന്നും വാര്‍ഡ് അംഗം പറയുന്നു.

അസ്മയുടെ അഞ്ചു പ്രസവനങ്ങളില്‍ ആദ്യ രണ്ടെണ്ണം ആശുപത്രിയിലും പിന്നെ മൂന്നെണ്ണം വീട്ടിലുമാണ് നടന്നത്. നവജാത ശിശു കൂടാതെ മുഹമ്മദ് യാസിന്‍, അഹമ്മദ് ഫൈസല്‍, ഫാത്തിമത്തുല്‍ സഹറ, അബുബക്കര്‍ കദീജ എന്നിവര്‍ ഇവരുടെ മറ്റു മക്കളാണ്.