തിരുവനന്തപുരം: ന്യൂനപക്ഷ വിഭാഗങ്ങള്ക്കു തെറ്റിദ്ധാരണ ഉണ്ടാക്കുന്ന പരാമര്ശങ്ങള് ഉണ്ടാകാതിരിക്കാന് എല്ലാവരും ശ്രദ്ധിക്കണമെന്ന് എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശന്റെ മലപ്പുറം പരാമര്ശത്തിനു മറുപടിയുമായി മുഖ്യമന്ത്രി പിണറായി വിജയന് പറഞ്ഞു. ''മുസ്ലീം വിഭാഗത്തെയും ന്യൂനപക്ഷ വിഭാഗത്തെയും ആക്ഷേപിക്കാനായി രാജ്യത്ത് സംഘപരിവാര് നീങ്ങുകയാണ്. അതിനുള്ള എല്ലാ പ്രചാരണവും നടക്കുകയാണ്. ആ ഘട്ടത്തില് ന്യൂനപക്ഷ വിഭാഗങ്ങള്ക്കു തെറ്റിദ്ധാരണ ഉണ്ടാക്കുന്ന പരാമര്ശങ്ങള് ഉണ്ടാകാതിരിക്കാന് എല്ലാവരും ശ്രദ്ധിക്കേണ്ടതാണ്. വെള്ളാപ്പള്ളി ഇക്കാര്യത്തില് വിശദീകരണം നല്കിയതാണെന്നും ഇക്കാര്യം എല്ലാവരും ശ്രദ്ധിക്കേണ്ടതാണ്''എന്നും മുഖ്യമന്ത്രി പറഞ്ഞു.
അതിനിടെ മലപ്പുറത്തെക്കുറിച്ചുള്ള വിവാദ പരാമര്ശത്തില് വിശദീകരണവുമായി എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശന് രംഗത്തു വന്നു. തന്റെ പ്രസംഗത്തില്നിന്നുള്ള ഒരു ഭാഗം അടര്ത്തിയെടുത്ത് പ്രചരിപ്പിക്കുകയായിരുന്നു. താനൊരു മുസ്ലിം വിരോധിയല്ലെന്നും ആടിനെ പട്ടിയാക്കാനാണ് ചില മുസ്ലിം ലീഗ് നേതാക്കളുടെ ശ്രമമെന്നും അദ്ദേഹം ആലപ്പുഴയില് പറഞ്ഞു. ബാബറി മസ്ജിദ് തകര്ക്കപ്പെട്ടപ്പോള് എസ്എന്ഡിപി യോഗമാണ് ശക്തമായി പ്രതികരിച്ചതെന്നും അദ്ദേഹം കൂട്ടിച്ചേര്ത്തു. ലീഗ് തന്നെ ചീത്തയാക്കാന് ശ്രമിക്കുകയാണ്. ഞാന് സമുദായത്തിനെതിരെ പറഞ്ഞെന്നു വരുത്തി തീര്ക്കുന്നതു ലീഗ് മാത്രമാണ്. എന്നെ മുസ്ലീം വിരോധിയാക്കാന് ലീഗ് ശ്രമിക്കുകയാണ്. ഞാന് മുസ്ലീം വിരോധിയല്ല. മുസ്ലീം സമുദായത്തിന്റെ കുത്തക ലീഗ് ഏറ്റെടുക്കേണ്ടെന്നും വെള്ളാപ്പള്ളി പറഞ്ഞു.
Related News
