കല്പറ്റ: ബത്തേരി നൂല്പ്പുഴ നമ്പിക്കൊല്ലിയില് പോലീസ് ജീപ്പ് ഉള്പ്പെടെ വാഹനങ്ങള് അടിച്ചുതകര്ത്ത് അച്ഛനും മകനും. നമ്പിക്കൊല്ലി കീത്തപ്പള്ളി സണ്ണി (56), മകന് ജോമോന് (33) എന്നിവരാണ് അക്രമം നടത്തിയത്. ഇന്നലെ വൈകുന്നേരം ബത്തേരി-ഊട്ടി പാതയിലായിരുന്നു സംഭവം. നമ്പിക്കൊല്ലിയിലെ വീട്ടില്നിന്ന് അച്ഛനും മകനും ആയുധങ്ങളുമായി റോഡിലിറങ്ങി വാഹനങ്ങക്കുനേരെ ആക്രമണം നടത്തുകയായിരുന്നു.
ലഹരിയുടെ ഉന്മാദത്തിലായിരുന്നു പിതാവിന്റെയും മകന്റെയും വിളയാട്ടമെന്ന് പറയുന്നു. റോഡില് ആളുകള്ക്കും യാത്രക്കാര്ക്കും നേരെ കത്തിവീശി ഭീകരാന്തരീക്ഷം സൃഷ്ടിച്ചു. പോലീസ് ജീപ്പിന്റെ ചില്ല് തകര്ത്തു. ജോമോനെ കീഴ്പ്പെടുത്താനുള്ള ശ്രമത്തിനിടെ പോലീസ് ഉദ്യോഗസ്ഥന് ധനേഷിന്റെ കൈവിരലുകള്ക്ക് പരിക്കേറ്റു. സാഹസികമായാണ് പ്രതികളെ പോലീസ് കീഴ്പ്പെടുത്തിയത്.
നമ്പ്യാര്കുന്നില്നിന്ന് ബത്തേരിയിലേക്ക് പോകുന്ന സ്വകാര്യ ബസ് യാത്രക്കാര്ക്കുനേരെയായിരുന്നു ആദ്യ ആക്രമണം. ബസ്സില്നിന്ന് ആളുകളെ ഇറക്കുമ്പോള് ജോമോന് ഓടിക്കയറി കത്തിവീശി യാത്രക്കാരെ ആക്രമിക്കാന് ശ്രമിച്ചു. ബസിന്റെ വാതിലിന്റെ ചില്ലും പിന്ഭാഗത്തെ ചില്ലും തകര്ത്തു. ബസിന് പിറകിലുണ്ടായിരുന്ന അഞ്ചോളം വാഹനങ്ങളുടെ ചില്ലും തകര്ത്തു. വിവരമറിഞ്ഞെത്തിയ പോലീസുകാരെ ചുറ്റികയും കൊടുവാളുമായാണ് പ്രതികള് നേരിട്ടത്. അക്രമത്തിനിടെ ജോമോന്റെ കത്തിയില് നിന്ന് സണ്ണിയുടെ കൈക്ക് മുറിവേറ്റു. കീഴ്പ്പെടുത്തിയ ഇരുവരെയും പോലീസ് ബത്തേരി താലൂക്ക് ആശുപത്രിയിലും പിന്നീട് മാനന്തവാടി മെഡിക്കല് കോളേജ് ആശുപത്രിയിലും പ്രവേശിപ്പിച്ചു.
Related News
