കൊല്ലം: പീഡന കേസില് ജാമ്യത്തിലിറങ്ങിയ മുന് സര്ക്കാര് അഭിഭാഷകന് പി ജി മനുവിനെ കൊല്ലത്തെ വാടക വീട്ടില് തൂങ്ങി മരിച്ച നിലയില് കണ്ടെത്തി. എന്ഐഎ ഉള്പ്പെടെയുളള ഏജന്സികളുടെ അഭിഭാഷകനായിരുന്നു. കേസിന്റെ ആവശ്യങ്ങള്ക്കായി താമസിച്ചിരുന്ന ആനന്ദവല്ലീശ്വരത്തെ വാടക വീട്ടിലാണ് തൂങ്ങിമരിച്ച നിലയില് കണ്ടെത്തിയത്. എറണാകുളം പിറവം സ്വദേശിയാണ് പി ജി മനു.
പീഡിപ്പിച്ചതായി പറയുന്ന യുവതിയുടെ വീട്ടില് കുടുംബ സമേതമെത്തി തൊഴുകൈയ്യോടെ മാപ്പ് പറയുന്ന മനുവിന്റെ വിഡിയോ സമൂഹ മാധ്യമങ്ങളിലൂടെ പുറത്തായിട്ട് അധികദിവസമായിരുന്നില്ല. ഇതുമൂലമുണ്ടായ മനോവിഷമമാകാം മനുവിനെ ആത്മഹത്യക്കു പ്രേരിപ്പിച്ചതെന്ന് സംശയിക്കുന്നു. പീഡനക്കേസില് ജാമ്യത്തില് ഇറങ്ങിയ മനു മറ്റൊരു യുവതിയെ പീഡിപ്പിച്ചതായി പരാതി ഉയര്ന്നിരുന്നു. ഇതോടെ കുടുംബത്തോടൊപ്പം യുവതിയുടെ വീട്ടിലെത്തിയാണ് മനു മാപ്പ് പറഞ്ഞത്.
ഞായറാഴ്ച രാവിലെ മനുവിനെ ഫോണില് ബന്ധപ്പെടാന് ശ്രമിച്ചെങ്കിലും ലഭിക്കാത്തതിനെ തുടര്ന്ന് ജൂനിയര് അഭിഭാഷകര് വീട്ടിലെത്തി അന്വേഷിച്ചപ്പോഴാണ് തൂങ്ങിമരിച്ച നിലയില് കണ്ടെത്തിയത്. പീഡനക്കേസിലെ അതിജീവിതയാണ് മുന് ഗവ. പ്ലീഡര് പി.ജി. മനുവിനെതിരെ പരാതി നല്കിയത്. 2018ല് ഉണ്ടായ ലൈംഗികാതിക്രമക്കേസില് 5 വര്ഷമായിട്ടും നടപടിയാകാതെ വന്നതോടെയാണ് നിയമ സഹായത്തിനായി പോലീസ് നിര്ദേശപ്രകാരം പരാതിക്കാരി ഗവ. പ്ലീഡറായ പി.ജി. മനുവിനെ സമീപിച്ചത്. മനുവിന്റെ ആവശ്യപ്രകാരം എറണാകുളം കടവന്ത്രയിലെ ഓഫിസിലെത്തിയപ്പോള് തന്നെ കടന്ന് പിടിച്ച് ബലാത്സംഗം ചെയ്തെന്നായിരുന്നു യുവതി നല്കിയ മൊഴി. ഇതിനു ശേഷം തന്റെ വീട്ടിലെത്തിയും ബലാത്സംഗം ചെയ്തതായി യുവതി ആരോപിച്ചു. മനു അയച്ച വാട്സാപ് ചാറ്റുകള്, ഓഡിയോ സംഭാഷണം എന്നിവ തെളിവായി നല്കിയാണ് യുവതി പോലീസില് പരാതി നല്കിയത്. തുടര്ന്ന് എറണാകുളം പുത്തന്കുരിശ് പോലീസിനു മുന്പാകെ ആയിരുന്നു മനു കീഴടങ്ങുകയായിരുന്നു. മുന്കൂര് ജാമ്യാപേക്ഷ ഹൈക്കോടതിയും സുപ്രീംകോടതിയും തള്ളിയതോടെ ആയിരുന്നു കീഴടങ്ങല്.
Related News
