ചുങ്കപ്പാറ- സമുദായത്തിന്റെ പൊതുതാല്പര്യ സംരക്ഷണത്തിനു വിഭാഗീയതകള്ക്കും സംഘടനാ സങ്കുചിതത്വങ്ങള്ക്കുമതീതമായി വിശാല കാഴ്ചപ്പാടുള്ള സംഘടനയാണ് ദക്ഷിണ കേരളാ ജംഇയ്യത്തുല് ഉലമാ എന്നും വര്ത്തമാനകാലവും ആനുകാലിക സംഭവങ്ങളും അതു തന്നെയാണ് സമൂഹത്തോട് ആവശ്യപെടുന്നതെതും ദക്ഷിണ കേരളാ ജംഇയ്യത്തുല് ഉലമാ സംസ്ഥാന ജനറല് സെക്രട്ടറി തൊടിയൂര് മുഹമ്മദ് കുഞ്ഞു മൗലവി പറഞ്ഞു. ദക്ഷിണയുടെ സഹയാത്രികരായ പ്രവാസികള്ക്കായുള്ള പോഷക ഘടകം ദക്ഷിണ കേരളാ ഇസ്ലാമിക് കള്ച്ചറല് സെന്റര് (DKIC) ബഹുമുഖ പദ്ധതികളോടെ നടത്തിവന്നിരുന്ന റമദാന് മുഴുനീള കാമ്പയിന് അവലോകന അനുമോദന യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഒന്നരവര്ഷം കൊണ്ട് ഡി കെ ഐ സി സിയുടെ പ്രവര്ത്തകര്ക്ക് ബഹുദൂരം സഞ്ചരിക്കാന് കഴിഞ്ഞത് അവരുടെ ആത്മാര്ഥതയും അര്പ്പണ മനോഭാവവും കൊണ്ടു മാത്രമാണ്. ഡി കെ ഐ സി സിയുടെ മുഴുവന് പ്രവര്ത്തനങ്ങളെയും അഭിമാനത്തോടെയാണ് മാതൃ സംഘടന നോക്കി കാണുന്നതെന്നും അദ്ദേഹം പറഞ്ഞു.
ഡി കെ ഐ സി സിയുടെ പ്രഖ്യപിത പ്രോഗ്രാമുകളായ മീലാദ് കാമ്പയിന്, റമദാന് കാമ്പയിന് എന്നീ രണ്ടു കാമ്പയിനുകളും ഒറ്റപ്പെട്ട സ്ഥലങ്ങള് ഒഴിച്ചാല് മുഴുവന് ഇടങ്ങളിലും വളരെ പ്രശംസനീയമായ നിലയിലാണ് നടത്തപ്പെട്ടത്. മക്കയിലും മദീനയിലും യു എ ഇയുടെ മുഴുവന് ഇമാറാത്തിലും കുവൈത്ത്, ഒമാന് എന്നീ സ്ഥലങ്ങളിലും മുഖ്യധാരാ സംഘടനകളുടെ പ്രതിനിധികളെ ഉള്പ്പെടുത്തി ഗംഭീരമായ നിലയിലാണ് ഇഫ്താര് സംഗമമടക്കമുള്ള റമദാന് കാമ്പയിന് നടത്തിയതെന്നു ജനറല് കണ്വീനര് പി കെ സുലൈമാന് മൗലവി പറഞ്ഞു.
ഡി കെ ഐ സി സിയുടെ പ്രവര്ത്തനങ്ങള് നേരില് കണ്ടറിയാനും മക്കയുടെ പുണ്യമണ്ണില് ദക്ഷിണയുടെ ബാനറില് തന്നെ ഒത്തു കൂടാനും കഴിഞ്ഞതു ജീവിതത്തിലെ വേറിട്ട അനുഭവമാണ്, നാളിതുവരേക്കും ദക്ഷിണക്ക് ഇത്തരത്തില് ഒരു പ്രവാസി സംഘടന ഇല്ലാതെ പോയല്ലോ എന്ന നിരാശയെ മറികടക്കും വിധത്തിലാണ് പ്രവര്ത്തകരുടെ ആത്മാര്ഥതയും ആവേശവുമെന്ന് ലജ്നത്തുല് മുഅല്ലിമീന് സംസ്ഥാന പ്രസിഡന്റ് സയ്യിദ് മുത്തു കോയാ ബാഫഖി തങ്ങള് പറഞ്ഞു.
ദക്ഷിണ കേരളാ ജംഇയ്യത്തുല് ഉലമാ കാഞ്ഞിരപ്പള്ളി മേഖലാ സെക്രട്ടറി ഷിബ്ലി മൗലവി, എരുമേലി മേഖലാ ജനറല് സെക്രട്ടറി സാബിര്, മൗലവി തടിക്കാട് സഈദു മൗലവി എന്നിവര് ആശംസാ പ്രസംഗങ്ങള് നടത്തി. വായ്പ്പൂര് കാഞ്ഞിരപ്പള്ളി എരുമേലി എന്നീ മേഖലകളിലെ നേതൃനിരയും നുസ്റത്തുല് ഉലമാ അംഗങ്ങളുമടക്കം ഒട്ടനവധി പേര് യോഗത്തില് പങ്കെടുത്തു. ഡി കെ ഐ സി സി ഗ്ലോബല് കമ്മിറ്റി പ്രസിഡന്റ് ഷറഫുദ്ദീന് ബാഖവിയുടെ അധ്യക്ഷതയില് കൂടിയ യോഗത്തില് നുസ്റത്തുല് ഉലമാ പ്രസിഡന്റ് ഹനീഫാ മൗലവി കറുകച്ചാല് സ്വാഗതവും മേഖലാ പ്രസിഡന്റ് ഷഫീഖ് മൗലവി നന്ദിയും പറഞ്ഞു.
Related News
