പൊന്നാനി: കേന്ദ്ര വഖഫ് ഭേദഗതി നിയമത്തിനെതിരെ പൊന്നാനിയിലെ 'സ്വമന്വയം' സംഘടിപ്പിച്ച ബഹുജനറലി കേന്ദ്ര സര്ക്കാരിന്റെ മുസ്ലിം ധ്വംസനത്തിനെതിരെയുള്ള പ്രതിഷേധ ഗര്ജ്ജനമായി. പൊന്നാനിയിലെ വിവിധ മത - സാംസ്കാരിക സംഘടനകളുടെ ഐക്യവേദിയായ 'സമന്വയം' ബാനറില് അരങ്ങേറിയ വഖഫ് സംരക്ഷണ പ്രത്യക്ഷ പ്രതിഷേധം മുന് കാലങ്ങളിലെ പൗരത്വ നിയമം പോലുള്ള പൊതുവിഷയങ്ങളില് രൂപപ്പെട്ട പ്രതിഷേധങ്ങളുടെ മറ്റൊരു പതിപ്പായി.
മുസ്ലിംകളുടെ മതപരമായ സ്വത്തുക്കള് കൈക്കലാക്കാനുള്ള തട്ടിപ്പാണ് വഖഫ് ഭേദഗതി നിയമമെന്നും ബാബരിയില് തുടങ്ങിയ കയ്യേറ്റങ്ങളുടെ തുടര്ച്ചയാണ് വഖഫ് സ്വത്തുക്കള് ലക്ഷ്യമാക്കിയുള്ള നീക്കമെന്നും പ്രകടനക്കാര് വിളിച്ചു പറഞ്ഞു. പൊന്നാനി ഫിഷിംഗ് ഹാര്ബര് പരിസരത്ത് നിന്ന് ആരംഭിച്ച ബഹുജന റാലി രണ്ട് മണിക്കൂറിലേറെ സമയം സഞ്ചരിച്ച് കുണ്ടുകടവ് ജംഗ്ഷനില് പൊതുസമ്മേളനത്തോടെ സമാപിച്ചു.
'സമന്വയം' കണ്വീനര് ഉസ്താദ് കെ എം ഖാസിം കോയ, അബ്ദുല് മജീദ് ഫൈസി, എം പി നിസാര്, അബ്ദുല് റഹ്മാന് ഫാറൂഖി, സി വി അബ്ദുല്ലക്കുട്ടി, സി വി അബ്ദുസാലിഹ്, കെ കെ മുഹമ്മദ് ഇഖ്ബാല്, കെ പി മൂസ തുടങ്ങിയവര് റാലിയ്ക്ക് നേതൃത്വം നല്കി.
നരേന്ദ്ര മോഡി - അമിത് ഷാ ഭരണത്തില് രാജ്യത്തെ ഒരു വിഭാഗത്തെ മാത്രം ലക്ഷ്യമിട്ട് തകൃതിയായി നടന്ന് വരുന്ന ശത്രുതാ നീക്കങ്ങള് ഇന്ത്യയുടെ ചരിത്രത്തില് ഇന്നോളം ഇല്ലാത്തതാണെന്നും ഇതൊരു രാഷ്ട്രീയ വിഷയമല്ലെന്നും പൊതുസമ്മേളനം ഉദ്ഘാടനം ചെയ്തുകൊണ്ട് 'സമന്വയം' ചെയര്മാന് ഉസ്താദ് കെ എം ഖാസിം കോയ പറഞ്ഞു. ബി ജെ പി തന്നെയും ഭരിച്ചിരുന്ന കാലത്ത് പോലും ഇതായിരുന്നില്ല സ്ഥിതി. എ പി ജെ അബ്ദുല് കലാമിനെ രാഷ്ട്രപതി ആക്കിയും ഇന്ത്യ - പാകിസ്ഥാന് - ബംഗ്ലാദേശ് രാജ്യങ്ങള്ക്കിടയില് സൗഹൃദം വളര്ത്തിയും എല്ലാവരെയും ചേര്ത്തുപിടിച്ചും ഇന്ത്യ ഭരിച്ച അടല് ബിഹാരി വാജ്പേയിയെ ഇന്നത്തെ ബി ജെ പി മാതൃകയാക്കിയാല് രാജ്യം രക്ഷപ്പെടുമെന്നും അദ്ദേഹം നിരീക്ഷിച്ചു. അബ്ദുല് മജീദ് ഫൈസി അധ്യക്ഷത വഹിച്ചു.
മുസ്ലിംലീഗ് സംസ്ഥാന സെക്രട്ടറി അബ്ദുള്റഹ്മാന് രണ്ടത്താണി എം എല് എ മുഖ്യപ്രഭാഷണം നടത്തി. യു ഡി എഫ് ജില്ലാ ചെയര്മാന് പി ടി അജയ് മോഹന്, കെ വി നദീര്, വി എം ബഷീര്, കെ കെ മുഹമ്മദ് ഇഖ്ബാല്, കെ പി മൂസ തുടങ്ങിയവര് പ്രസംഗിച്ചു. അബ്ദുറഹ്മാന് ഫാറൂഖി സ്വാഗതവും സി വി അബൂ സാലി നന്ദിയും പറഞ്ഞു. ഷാഹുല് ഹമീദ് മുസ്ല്യാര് നിര്വഹിച്ച ഖുര്ആന് പാരായണത്തോടെയായിരുന്നു സമ്മേളനം തുടക്കം. വന് ജനാവലിയുടെ ആവേശം തിരയടിച്ച സാന്നിധ്യത്തിലും ഗതാഗത തടസ്സം ഉണ്ടാക്കാതെയും നടത്തിയ റാലി എല്ലാ വിഭാഗങ്ങളുടെയും പ്രശംസ പിടിച്ചു പറ്റി.
