ജിദ്ദ: ഇന്ത്യന്‍ പ്രധാനമന്ത്രി നരേന്ദ്ര മോദി ദ്വിദിന സന്ദര്‍ശനാര്‍ഥം നാളെ (ചൊവ്വാഴ്ച) ഉച്ചക്ക് ജിദ്ദയിലെത്തും. ഉച്ചക്ക് 12.40ന് ജിദ്ദ കിങ് അബ്ദുല്‍ അസീസ് അന്താരാഷ്ട്ര വിമാനത്താവളത്തില്‍ ഇറങ്ങുന്ന പ്രധാനമന്ത്രിക്ക് വന്‍ വരവേല്‍പാകും നല്‍കുക. പ്രധാനമന്ത്രിയായ ശേഷം മോദിയുടെ മൂന്നാമത് സൗദി സന്ദര്‍ശനമാണിത്. നേരത്തെ 2016ലും 2019ലും മോദി സൗദി സന്ദര്‍ശിച്ചിരുന്നു. വിമാനത്താവളത്തില്‍നിന്ന് നേരെ റിറ്റ്‌സ് കാള്‍ട്ടണ്‍ ഹോട്ടലിലേക്ക് പോകുന്ന മോദി ഉച്ചക്ക് രണ്ട് മുതല്‍ 2.30 വരെ ക്ഷണിക്കപ്പെട്ട ഇന്ത്യന്‍ സാമൂഹിക പ്രതിനിധികളുടെ യോഗത്തെ അഭിസംബോധന ചെയ്യും.

തുടര്‍ന്ന് സൗദി കിരീടാവകാശിയും പ്രധാനമന്ത്രിയുമായ അമീര്‍ മുഹമ്മദ് ബിന്‍ സല്‍മാനുമായി ജിദ്ദയിലെ അല്‍സലാം പാലസില്‍ കൂടിക്കാഴ്ച്ച നടത്തും. ഇന്ദിരാ ഗാന്ധിക്കു ശേഷം ജിദ്ദിയിലെത്തുന്ന ആദ്യ പ്രധാനമന്ത്രിയാണ് മോദി. സൗദി കിരീടാവകാശിയുമായുള്ള കൂടിക്കാഴ്ചയാണ് സന്ദര്‍ശനത്തിലെ മുഖ്യപരിപാടി. ഇന്ത്യ-സൗദി സ്ട്രാറ്റജിക് പാര്‍ട്ണര്‍ഷിപ്പ് കൗണ്‍സിലിന്റെ രണ്ടാം യോഗത്തില്‍ ഇരു രാഷ്ട്രനേതാക്കളും സംബന്ധിക്കും. ബിസിനസ് പ്രമുഖരുമായുള്ള കൂടിക്കാഴ്ചയില്‍ മോദി പങ്കെടുക്കും. ഇന്ത്യയും സൗദിയും തമ്മില്‍ സാമൂഹിക സാംസ്‌കാരിക, വ്യാപാര ബന്ധങ്ങളുടെ നൂറ്റാണ്ടുകളുടെ ചരിത്രമുള്ളതുകൊണ്ട് തന്നെ പ്രധാനമന്ത്രിയുടെ ഇപ്പോഴത്തെ സൗദി സന്ദര്‍ശനവും ഇന്ത്യ-സൗദി സൗഹൃദത്തില്‍ പുതിയ നാഴികക്കല്ല് തീര്‍ക്കുമെന്നാണ് പ്രതീക്ഷിക്കുന്നത്.

ജിദ്ദയിലെ ഏതെങ്കിലുമൊരു ഫാക്ടറിയിലെ ഇന്ത്യന്‍ തൊഴിലാളികളുമായി പ്രധാനമന്ത്രി സംവദിച്ചേക്കും. കൂൂതെ 'നിയോം' അടക്കമുള്ള വിനോദ സഞ്ചാര കേന്ദ്രങ്ങളിലും മോദി സന്ദര്‍ശന് നടത്തുമെന്ന് സൂചനയുണ്ട്. സൗദി കിരീടാവകാശി മുഹമ്മദ് ബിന്‍ സല്‍മാന്റെ ക്ഷണമനുസരിച്ചാണ് ദ്വിദിന സന്ദര്‍ശനം നടത്തുന്നതെന്ന് ഇന്ത്യന്‍ വിദേശകാര്യ സെക്രട്ടറി വിക്രം മിശ്രി നേരത്തേ അറിയിച്ചിരുന്നു.