കോട്ടയം: കോട്ടയം തിരുവാതുക്കലില്‍ മുന്‍ പ്രവാസിയും ബിസിനസുകാരനും ഭാര്യയും വീട്ടില്‍ കൊല്ലപ്പെട്ട നിലയില്‍ കണ്ടെത്തി. കോട്ടയം തിരുനക്കര ഇന്ദ്രപ്രസ്ഥം ഓഡിറ്റോറിയം ഉടമ വിജയ കുമാര്‍ (64), ഭാര്യ മീര (60) എന്നിവരാണ് കൊല്ലപ്പെട്ടത്. രക്തം വാര്‍ത്ത നിലയില്‍ രണ്ട് ഇടങ്ങളില്‍ നഗരായ നിലയിലായിരുന്നു മൃതദേഹം കണ്ടെത്തിയത്.

ഒരു മൃതദേഹം കിടപ്പ് മുറിയിലും മറ്റൊരെണ്ണം ഹാളിലുമായിരുന്നു. മുഖത്തും തലയിലും ആഴത്തിലുള്ള മുറിവുകളുണ്ട്. വെസ്റ്റ് പോലീസ് സംഭവസ്ഥലത്തെത്തി. സി.സി.ടി.വി ദൃശ്യങ്ങള്‍ ഉള്‍പ്പെടെ പരിശോധിച്ചുവരികയാണ്. ഇരുനില വീട്ടില്‍ വിജയകുമാറും മീരയും മാത്രമാണ് താമസിച്ചിരുന്നത്. വിദേശത്ത് ആയിരുന്ന വിജയകുമാര്‍ വിരമിച്ച ശേഷം നാട്ടില്‍ ഭാര്യക്കൊപ്പം കഴിയുകയായിരുന്നു. രാവിലെ വീട്ടിലെത്തിയ ജോലിക്കാരിയാണ് മൃതദേഹം കണ്ടെത്തിയത്. വീട്ടില്‍ ഒരു സുരക്ഷാ ജീവനക്കാരന്‍ ഉണ്ടായിരുന്നുവെങ്കിലും പ്രായമായി ഇദ്ദേഹം സംഭവം അറിഞ്ഞിരുന്നില്ല. നാട്ടുകാര്‍ അറിഞ്ഞപ്പോഴാണ് ഇദ്ദേഹവും വിവരം അറിഞ്ഞതെന്ന് പറയുന്നു.

സംഭവത്തില്‍ നേരത്തെ ജോലിക്കു നിന്നിരുന്ന അസം സ്വദേശി അമിത് പോലീസ് കസ്റ്റഡിയിലായിട്ടുണ്ട്. ദമ്പതികള്‍ക്ക് ഒരു മകനും മകളുമാണുള്ളത്. മകന്‍ നേരത്തെ ട്രെയിന്‍ തട്ടി മരിച്ചിരുന്നു. മകള്‍ വിദേശത്താണ്.