ജിദ്ദ: എന്‍ട്രി വിസയുടെ കാലാവധി കഴിഞ്ഞിട്ടും രാജ്യം വിടാത്ത വിദേശികളുടെ കാര്യത്തില്‍ കര്‍ശന നടപടികളുമായി് സൗദി അറേബ്യ. വലിയ സംഖ്യ പിഴയും പുറമേ തടവും തുടര്‍ന്ന് നാട് കടത്തലുമാണ് ഇത്തരക്കാരെ കാത്തിരിക്കുന്നതെന്ന് സൗദി ആഭ്യന്തര മന്ത്രാലയം ഓര്‍മിപ്പിച്ചു. പിഴ അരലക്ഷം റിയാല്‍ വരെ എത്തും (ഏകദേശം 11 ലക്ഷത്തിലേറെ ഇന്ത്യന്‍ രൂപ). ഇതോടൊപ്പം ആറ് മാസം വരെ നീളുന്ന തടവും അനുഭവിക്കണം. എല്ലാറ്റിനും ഒടുവില്‍ നാട് കടത്തലും നേരിടണം.

സൗദി അറേബ്യയില്‍ നിലവിലുള്ള ഹജ്ജ്, ഉംറ ചട്ടങ്ങളും നിര്‍ദ്ദേശങ്ങളും പാലിക്കേണ്ടതിന്റെ പ്രാധാന്യം ആഭ്യന്തര മന്ത്രാലയം ഊന്നിപ്പറഞ്ഞു. ഹജ്ജ്, ഉംറ, തൊഴില്‍, വിസിറ്റ്, ഫാമിലി തുടങ്ങിയ വിസകളിലൂടെ രാജ്യത്ത് പ്രവേശിക്കുന്നവര്‍ അവരവരുടെ വിസയുടെ കാലാവധി തീരും മുമ്പായി നിയമാനുസൃതം രാജ്യത്തിന്റെ അതിര്‍ത്തി കടന്നു പോകണം.