കോഴിക്കോട്: ജില്ലയില്‍ പാകിസ്ഥാന്‍ പൗരത്വം ഉള്ളവര്‍ രാജ്യം വിടണമെന്ന് ആവശ്യപ്പെട്ട് കോഴിക്കോട് ജില്ലയിലെ മൂന്നു പേര്‍ക്കു നല്‍കിയ നോട്ടീസ് പോലീസ് പിന്‍വലിച്ചു. ഉന്നത നിര്‍ദേശത്തെ തുടര്‍ന്നാണ് തീരുമാനം. കൊയിലാണ്ടിയില്‍ താമസിക്കുന്ന ഹംസ, വടകര വൈക്കിലിശ്ശേരിയില്‍ താമസിക്കുന്ന ഖമറുന്നീസ, സഹോദരി അസ്മ എന്നിവര്‍ക്കാണ് ഞായറാഴ്ചക്കകം രാജ്യം വിട്ടുപോകാനാവശ്യപ്പെട്ട് പോലീസ് നോട്ടീസ് നല്‍കിയത്. മൂന്നുപേരും ലോങ് ടേം വിസക്ക് അപേക്ഷ നല്‍കിയിരുന്നുവെന്ന് പോലീസ് അറിയിച്ചു. ഈ സാഹചര്യത്തിലാണ് നോട്ടീസ് പിന്‍വലിച്ചത്.

പാക് പൗരത്വമുള്ള നിങ്ങള്‍ മതിയായ രേഖകള്‍ ഇല്ലാതെയാണ് ഇന്ത്യയില്‍ കഴിയുന്നതെന്ന് ബോധ്യപ്പെട്ടതിനാല്‍ രാജ്യം വിട്ടുപോകണമെന്നാണ് വടകര, കൊയിലാണ്ടി പോലീസ് നല്‍കിയ നോട്ടീസില്‍ പറയുന്നത്. രാജ്യം വിട്ടുപോകാത്തപക്ഷം നിയമ നടപടികളുണ്ടാകുമെന്നും നോട്ടീസില്‍ വ്യക്തമാക്കിയിരുന്നു.