കൊച്ചി: നവജാത ശിശുവിനെ കൊച്ചിയിലെ സ്വകാര്യ ആശുപത്രിയില് ഉപേക്ഷിച്ചുപോയ ജാര്ഖണ്ഡ് സ്വദേശികള് പോലീസ് പിടിയില്. കുഞ്ഞിനെ ഏറ്റെടുക്കാന് തിരിച്ചെത്തിയപ്പോഴാണ് എറണാകുളം സൗത്ത് റെയില്വേ സ്റ്റേഷനില് നിന്ന് മാതാപിതാക്കളെ കസ്റ്റഡിയിലെടുത്തത്. ആശുപത്രി ബില്ലടക്കാന് പണമില്ലാത്തതിനാലാണ് പ്രസവശേഷം കുഞ്ഞിനെ ഉപേക്ഷിച്ചതെന്നാണ് ഇവര് പറയുന്നത്. ഇവര് ഉപേക്ഷിച്ച കുഞ്ഞിനെ സര്ക്കാര് ആശുപത്രി ജീവനക്കാര് ഏറ്റെടുക്കുകയും പരിപാലിക്കുകയുമായിരുന്നു. നിലവില് സിഡബ്ലിയുസിയുടെ സംരക്ഷണയിലുള്ള കുഞ്ഞ് അങ്കമാലിയിലെ ശിശു സംരക്ഷണ കേന്ദ്രത്തിലാണിപ്പോഴുള്ളത്.
കുഞ്ഞിനെ ഉപേക്ഷിച്ച സംഭവത്തില് ദമ്പതികള്ക്കെതിരെ പോലീസ് നേരത്തെ തന്നെ കേസ് രജിസ്റ്റര് ചെയ്തിരുന്നു. എന്നാല് കുഞ്ഞിനെ കാണണമെന്നും ഏറ്റെടുക്കാന് തയാറാണെന്നും മാതാപിതാക്കള് പോലീസിനെ അറിയിക്കുകയായിരുന്നു. നിലവില് സിഡബ്ലുസിയുടെ സംരക്ഷണയില് കഴിയുന്ന കുഞ്ഞിനെ ഇനി ഏറ്റെടുക്കണമെങ്കില് മാതാപിതാക്കള്ക്ക് ഏറെ കടമ്പകള് കടക്കാനുണ്ട്.
വീഡിയോ കോളിലൂടെ കുഞ്ഞിനെ മാതാപിതാക്കളെ കാണിച്ചിരുന്നു. ഇതിന് പിന്നാലെയാണ് കുഞ്ഞിനെ നേരിട്ട് കാണാനും തിരികെ കൊണ്ടുപോകണമെന്ന ആവശ്യവുമായി ദമ്പതികള് എത്തിയത്. എന്നാല് കേസുളളതിനാല് എറണാകുളത്തെത്തിയ ഉടന് പോലീസ് ഇവരെ കസ്റ്റഡിയിലെടുക്കുകയായിരുന്നു.
Related News
