കൊച്ചി: കൈക്കൂലി വാങ്ങുന്നതിനിടെ കൊച്ചി കോര്‍പറേഷന്‍ ഉദ്യോഗസ്ഥ വിജിലന്‍സ് പിടിയില്‍. കോര്‍പറേഷന്‍ വൈറ്റില സോണല്‍ ഓഫിസിലെ ബില്‍ഡിങ് ഇന്‍സ്‌പെക്ടര്‍ തൃശൂര്‍ സ്വദേശി സ്വപ്നയാണ് പിടിയിലായത്. ഓവര്‍സിയര്‍ ഗ്രേഡ്-1 ഉദ്യോഗസ്ഥയാണ്. ബുധനാഴ്ച വൈകീട്ട് വൈറ്റില പൊന്നുരുന്നിയില്‍വെച്ച് കെട്ടിട നിര്‍മാണ പെര്‍മിറ്റിനായി 15,000 രൂപ വാങ്ങുമ്പോഴായിരുന്നു ഇവര്‍ വിജിലന്‍സ് സംഘത്തിന്റെ പിടിയിലകപ്പെട്ടത്.

ബില്‍ഡിങ് ഡ്രോയിങ് പെര്‍മിറ്റിന് അനുമതി നല്‍കാന്‍ 15,000 രൂപയാണ് ഇവര്‍ ആവശ്യപ്പെട്ടത്. കുറച്ചു ദിവസമായി സ്വപ്ന വിജിലന്‍സിന്റെ നിരീക്ഷണത്തിലായിരുന്നു. ഇതിനിടെയാണ് ഇവര്‍ കൈക്കൂലി വാങ്ങാനെത്തുന്ന വിവരം ലഭിച്ചത്. സ്വന്തം വാഹനത്തിലാണ് സ്വപ്ന കൈക്കൂലി വാങ്ങാനെത്തിയത്. വ്യാഴാഴ്ച കോടതിയില്‍ ഹാജരാക്കും. കോര്‍പറേഷനിലെ പല സോണല്‍ ഓഫിസുകളിലും കൈക്കൂലി വ്യാപകമാണെന്ന പരാതിയെത്തുടര്‍ന്ന് വിജിലന്‍സ് പ്രത്യേകം പരിശോധന നടത്തിയിരുന്നു.