തിരുവനന്തപുരം: റാപ്പര് വേടനെതിരായ വനം വകുപ്പ് നടപടിയെ ജോണ് ബ്രിട്ടാസ് എം.പി രൂക്ഷമായി വിമര്ശിച്ചു. നിയമലംഘനം നടത്തിയിട്ടുണ്ടെങ്കില് ശിക്ഷിക്കപ്പെടട്ടെയെന്നും എന്നാല് ചില ഉദ്യോഗസ്ഥര് അമിത താല്പര്യമെടുത്ത് ആഘോഷമാക്കുന്ന രീതി ഒരു തരത്തിലും അഭികാമ്യമല്ലെന്ന് ഫേസ് ബുക്കില് ബ്രിട്ടാസ് കുറിച്ചു.
ഫോസ് ബുക്ക് കുറിപ്പ്: റാപ്പര് വേടനെ ഞാന് കണ്ടിട്ടില്ല. അദ്ദേഹത്തിന്റെ സംഗീത ശാഖ എനിക്കത്ര പരിചിതവുമല്ല. എന്നാല് അദ്ദേഹത്തെ മുന്നിര്ത്തി സൃഷ്ടിക്കപ്പെട്ട വിവാദത്തെക്കുറിച്ച് പറയാതിരിക്കാന് വയ്യ. നിയമലംഘനം നടത്തിയിട്ടുണ്ടെങ്കില് ശിക്ഷിക്കട്ടെ. എന്നാല് ചില ഉദ്യോഗസ്ഥര് അമിത താല്പര്യമെടുത്ത് ആഘോഷമാക്കുന്ന രീതി ഒരുതരത്തിലും അഭികാമ്യമല്ല. വേടന്റെ കഴുത്തില് പുലിപല്ല് കണ്ടെത്തിയത് മഹാസംഭവം എന്ന നിലയ്ക്കാണ് പ്രചരിപ്പിക്കപ്പെട്ടത്. ആറ്റംബോംബ് ഒന്നുമല്ലല്ലോ അത്. എത്രയോ പഴയ വീടുകളില് വന്യമൃഗങ്ങളുടെ ശരീരഭാഗങ്ങള് കൊണ്ട് ഉണ്ടാക്കിയ കരകൗശല വസ്തുക്കള് ഉണ്ടാകും. ഇതിനേക്കാള് എന്നെ അസ്വസ്ഥനാക്കിയത് മറ്റൊരു വാര്ത്താ ശകലമാണ്; ''വേടന്റെ അമ്മ ശ്രീലങ്കന് വംശജ, ആ കണക്ഷന് കേസില് ഉണ്ടെന്ന് വനംവകുപ്പ്''. ശുദ്ധ തെമ്മാടിത്തവും അസംബന്ധവുമാണ് ഇത്.
വനം മന്ത്രി എ.കെ ശശീന്ദ്രനും വനം വകുപ്പ് ഉദ്യോഗസ്ഥരുടെ നടപടിക്കെതിരെ പ്രതികരിച്ചിരുന്നു. വേടനോട് കാണിച്ച ഉദ്യോഗസ്ഥരുടെ സമീപനം സാമൂഹ്യ മാധ്യമങ്ങളിലും വിമര്ശന വിധേയമായിട്ടുണ്ട്.
Related News
