കോട്ടയം: മീനച്ചിലാറ്റില്‍ കുളിക്കാനിറങ്ങിയ രണ്ടു വിദ്യാര്‍ഥികളെ കാണാതായി. പെരുവന്താനം സ്വദേശി ആല്‍ബിന്‍ ജോസഫ്, അടിമാലി സ്വദേശി അമല്‍ കെ.ജോമോന്‍ എന്നിവരെയാണ് കാണാതായത്. പാലാ ഭരണങ്ങാനം വിലങ്ങുപാറയിലാണ് അപകടം. കുളിക്കാനായി നാലംഗ സംഘമാണ് ഇവിടെ എത്തിയത്. ഇതില്‍ രണ്ടുപേരെയാണ് കാണാതായത്. ഭരണങ്ങാനത്ത് ജര്‍മന്‍ ഭാഷ പഠിക്കാനായി എത്തിയതായിരുന്നു ഇവര്‍. വിദ്യാര്‍ഥികള്‍ക്കായി അഗ്നിശമന രക്ഷാസേനയും പോലീസും നാട്ടുകാരും തിരച്ചില്‍ തുടരുകയാണ്.