തിരുവനന്തപുരം: കോണ്ഗ്രസില് കെ.പി.സി.സി പ്രസിഡന്റ് മാറ്റ ചര്ച്ച വീണ്ടും സജീവം. നിലമ്പൂര് ഉപതെരഞ്ഞെടുപ്പിനു മുന്പായി മാറ്റം ഉണ്ടായേക്കുമെന്നാണ് സൂചന. രണ്ടു മാസം മുമ്പ് തലപ്പത്തെ അഴിച്ചുപണിക്ക് നീക്കം തുടങ്ങിയെങ്കിലും പ്രസിഡന്റ് കെ. സുധാകരന്റെ വിയോജിപ്പിനെ തുടര്ന്ന് നിര്ത്തിവെച്ച ചര്ച്ചകളാണ് കൃത്യമായ പേരും സമവാക്യങ്ങളുമടക്കം നിര്ണയിച്ച് പുനരാംരംഭിച്ചത്. സണ്ണി ജോസഫ് എം.എല്.എ, ആന്റോ ആന്റണി എം.പി എന്നീ പേരുകളാണ് ഇപ്പോള് സജീവമായുള്ളത്. കെ. സുധാകരനെ ഡല്ഹിയിലേക്ക് വിളിച്ച് ഹൈകമാന്ഡ് കാര്യങ്ങള് ബോധ്യപ്പെടുത്തി എന്നാണ് വിവരം. നിലമ്പൂര് ഉപതെരഞ്ഞെടുപ്പുമായി ബന്ധപ്പെട്ട നിര്ണായക യു.ഡി.എഫ് യോഗം ചേരുമ്പോഴാണ് സുധാകരന് അതില് പങ്കെടുക്കാതെ ഡല്ഹിയിലേക്ക് പോയത്.
'അധ്യക്ഷ സ്ഥാനം മാറേണ്ടതുണ്ടെന്ന് തോന്നുന്നില്ല. പക്ഷേ ഹൈക്കമാന്ഡിന്റെ ഏതു തീരുമാനവും അംഗീകരിക്കും. ഹൈക്കമാന്ഡ് എന്തു തീരുമാനമെടുക്കുന്നുമോ അത് ശിരസാ വഹിക്കും. താനല്ല, അവരാണ് മാറ്റേണ്ടത്. ഹൈകമാന്ഡ് തീരുമാനം തന്റെ അന്തിമ തീരുമാനം കൂടിയായിരിക്കുമെന്നും സുധാകരന് ഹൈക്കമാന്ഡുമായുള്ള കൂടുക്കാഴ്ചക്കു ശേഷം പറഞ്ഞിരുന്നു.
ഡല്ഹി കൂടിക്കാഴ്ചയില് നിയമസഭ തെരഞ്ഞെടുപ്പ് വരെ കെ.പി.സി.സി പ്രസിഡന്റ് സ്ഥാനത്ത് തുടരാന് അനുവദിക്കണമെന്ന് സുധാകരന് ആവശ്യപ്പെട്ടെങ്കിലും അതംഗീകരിച്ചില്ലെന്നാണ് സൂചന. നിലമ്പൂര് ഉപതെരഞ്ഞെടുപ്പിന് മുമ്പ് ഹൈകമാന്ഡ് തീരുമാനമുണ്ടാകും. എ.ഐ.സി.സി നേതൃപദവിയിലേക്ക് കെ. സുധാകരനെ ഉയര്ത്തിയ ശേഷമാകും അധ്യക്ഷസ്ഥാനത്ത് നിന്നുള്ള മാറ്റമെന്ന് പറയുന്നു. മുതിര്ന്ന നേതാവെന്ന പരിഗണനയില് പ്രവര്ത്തക സമിതിയില് പ്രത്യേക ക്ഷണിതാവാക്കാനാണ് ഹൈക്കമാന്ഡ് നീക്കം.
Related News
