കൊച്ചി: പൊതുജനാരോഗ്യ രംഗത്ത് മധ്യ കേരളത്തിന്റെ മുഖമായി മാറാന് പോകുന്ന കൊച്ചിന് കാന്സര് റിസേര്ച്ച് സെന്റര് മേയ് 15-ഓടെ പൂര്ണ്ണ സജ്ജമാകുമെന്ന് ആരോഗ്യ വകുപ്പ് മന്ത്രി വീണ ജോര്ജ്ജ്. കളമശേരി മെഡിക്കല് കോളേജിലെ സൂപ്പര് സ്പെഷ്യാലിറ്റി ബ്ലോക്കിന്റെ നിര്മ്മാണ പ്രവര്ത്തനം അന്തിമ ഘട്ടത്തിലാണെന്നും ജൂലൈ 30-ഓടെ പൂര്ത്തിയാക്കാന് കഴിയുമെന്നാണ് പ്രതീക്ഷിക്കുന്നതെന്നും മന്ത്രി വ്യക്തമാക്കി.
കൊച്ചിന് കാന്സര് റിസേര്ച്ച് സെന്റര് (സി.സി.ആര്.സി), എറണാകുളം മെഡിക്കല് കോളേജ് എന്നിവയുടെ നിര്മ്മാണ പുരോഗതി അവലോകനം ചെയ്യാന് ചേര്ന്ന യോഗത്തില് സംസാരിക്കുകയായിരുന്നു മന്ത്രി. ഇരു കേന്ദ്രങ്ങളും സന്ദര്ശിച്ച ശേഷം വ്യവസായ മന്ത്രി പി. രാജീവിന്റെ സാന്നിധ്യത്തിലായിരുന്നു യോഗം ചേര്ന്നത്.
കാന്സര് റിസേര്ച്ച് സെന്ററിന്റെ സിവില്, ഇലക്ട്രിക്കല്, പ്ലംബിംഗ് ജോലികള് ഉള്പ്പെടെ നിര്മ്മാണ പ്രവര്ത്തനങ്ങള് പൂര്ത്തിയായിട്ടുണ്ട്. വൈദ്യുതി കണക്ഷന്, അഗ്നി രക്ഷാസേനയുടെ എന്.ഒ.സി തുടങ്ങിയവ ലഭിച്ചിട്ടുണ്ട്. കുടിവെള്ള കണക്ഷനുമായി ബന്ധപ്പെട്ട പ്രവര്ത്തനങ്ങള് ഉടന് തന്നെ പൂര്ത്തിയാക്കും. മലിനീകരണ നിയന്ത്രണ ബോര്ഡിന്റേത് ഉള്പ്പെടെയുള്ള ഏതാനും അനുമതികള് കൂടിയാണ് ഇനി ലഭിക്കാനുള്ളത്. ഇതിനായി യുദ്ധകാലാടിസ്ഥാനത്തിലുള്ള നടപടികള് വേണമെന്ന് യോഗത്തില് ആരോഗ്യ മന്ത്രി ഉദ്യോഗസ്ഥര്ക്ക് കര്ശന നിര്ദ്ദേശം നല്കി.
ആശുപത്രിയിലേക്ക് വേണ്ട മെഡിക്കല് ഉപകരണങ്ങള് സ്ഥാപിക്കുന്ന ജോലിയും അവസാന ഘട്ടത്തിലാണ്. സ്കാനിംഗ് മെഷീനുകള് ഉള്പ്പെടെയുള്ള പ്രധാനപ്പെട്ട ഉപകരണങ്ങളെല്ലാം സജ്ജമാക്കിയിട്ടുണ്ടെന്നും ബാക്കിയുള്ളവ എത്രയും വേഗം സ്ഥാപിക്കുമെന്നും അധികൃതര് അറിയിച്ചു. ഓപ്പറേഷന് തീയേറ്ററുകള് ഉടന് പ്രവര്ത്തന സജ്ജമാക്കുമെന്നും ഉദ്യോഗസ്ഥര് വ്യക്തമാക്കി. എറണാകുളം മെഡിക്കല് കോളേജ് സൂപ്പര് സ്പെഷ്യാലിറ്റി ബ്ലോക്കിന്റെ നിര്മ്മാണ പ്രവര്ത്തനങ്ങളും അന്തിമ ഘട്ടത്തിലാണ്.
283 കോടിയോളം രൂപയുടെ വികസന പ്രവര്ത്തനങ്ങളാണ് മെഡിക്കല് കോളേജില് നടക്കുന്നത്. സിവില്, ഇലക്ട്രിക്കല്, പ്ലംബിംഗ് ജോലികള് 98 ശതമാനവും പൂത്തിയായിട്ടുണ്ടെന്ന് അധികൃതര് അറിയിച്ചു. ജൂലൈ 30-ഓടെ പൂര്ണ്ണ സജ്ജമാക്കുന്നതിനായി ഊര്ജ്ജിത പ്രവര്ത്തനങ്ങള് നടത്താനാണ് ലക്ഷ്യമിടുന്നത്. നീണ്ടുപോകുന്ന സാഹചരുമുണ്ടായാല് കര്ശന നടപടികള് സ്വീകരിക്കുമെന്ന് മന്ത്രി വീണ ജോര്ജ് അറിയിച്ചു. ഇതു സംബന്ധിച്ച് കൃത്യമായ അവലോകനം നടത്താന് ജില്ലാ കളക്ടര് ഉള്പ്പെടെയുള്ള ഉന്നത ഉദ്യോഗസ്ഥര്ക്ക് മന്ത്രിമാര് നിര്ദ്ദേശം നല്കി.
പദ്ധതി പൂര്ത്തിയാകുന്നതോടെ അത്യാധുനിക സൗകര്യങ്ങളുള്ള സൂപ്പര് സ്പെഷ്യാലിറ്റി ആശുപത്രിയായി മെഡിക്കല് കോളേജ് മാറും. ആരോഗ്യ മേഖലയില്
കൊച്ചിയുടെ വന് കുതിപ്പിനാകും ഇരു പദ്ധതികളും വഴിയൊരുക്കുക.
മെഡിക്കല് കോളേജ് കോണ്ഫറന്സ് ഹാളില് നടന്ന അവലോകന യോഗത്തില് ആരോഗ്യ വകുപ്പ് അഡീഷണല് ചീഫ് സെക്രട്ടറി ഡോ. രാജന് ഖോബ്രാഗഡേ, ജില്ലാ കളക്ടര് എന്.എസ്.കെ ഉമേഷ്, കൊച്ചിന് കാന്സര് സെന്റര് ഡയറക്ടര് ഡോ. ബാലഗോപാല്, എറണാകുളം മെഡിക്കല് കോളേജ് പ്രിന്സിപ്പല് ഡോ. എസ്. പ്രതാപ്, ഡെപ്യൂട്ടി സൂപ്രണ്ട് ഡോ. ഗീതാ നായര്, കിഫ്ബി ടെക്നിക്കല് ഹെഡ് ശ്രീകണ്ഠന് നായര്, കേരള മെഡിക്കല് സര്വീസസ് കോര്പറേഷന് ലിമിറ്റഡ് ജനറല് മാനേജര് ഡോ. ഷിബുലാല്, ജില്ല മെഡിക്കല് ഓഫീസര് ഡോ. ആശാ ദേവി, മെഡിക്കല് കോളേജ് സൂപ്രണ്ട് ഡോ. ഗണേഷ് മോഹന്, വിവിധ വകുപ്പുകളിലെ ഉദ്യോഗസ്ഥര് തുടങ്ങിയവര് സന്നിഹിതരായി.
Related News
