പാലക്കാട്: മലയാളി യുവാവിനെ ജമ്മു കശ്മീരില്‍ മരിച്ച നിലയില്‍ കണ്ടെത്തിയ സംഭവത്തില്‍ കേരള പോലീസും അന്വേഷണം തുടങ്ങി. പാലക്കാട് കാഞ്ഞിരപ്പുഴ കറുവാന്‍തൊടി സ്വദേശി മുഹമ്മദ് ഷാനിബിനെ ആണ് മരിച്ച നിലയില്‍ കണ്ടെത്തിയത്. ഷാനിബ് എന്തിന് കശ്മീരല്‍ പോയി എന്ന കാര്യമാണ് പോലീസ് തിരക്കുന്നത്. വീട്ടുകാരില്‍ നിന്ന് വിവരങ്ങള്‍ പോലീസ് ശേഖരിച്ചു വരികയാണ്. പുല്‍വാമയിലെ വനപ്രദേശത്തോട് ചേര്‍ന്ന നിലയിലാണ് കഴിഞ്ഞ ദിവസം യുവാവിന്റെ മൃതദേഹം കണ്ടെത്തിയത്. യുവാവ് എങ്ങനെ കാശ്മീരിലെത്തിയെന്നതില്‍ ഇനിയും വ്യക്തത ലഭിച്ചിട്ടില്ലെന്ന് പോലീസ് പറയുന്നു.

യുവാവിന്റെ മൃതദേഹത്തിന് രണ്ടാഴ്ചയിലേറെ പഴക്കമുണ്ടെന്നാണ് പ്രാഥമിക നിഗമനം. വന്യമൃഗങ്ങളുടെ ആക്രമണം ഉണ്ടായതായി വിവരമുണ്ട്. യുവാവിന്റെ മൃതദേഹം കണ്ടെത്തിയതിനെ കുറിച്ച് കശ്മീര്‍ ഗുല്‍മാര്‍ഗ് പോലീസ് പാലക്കാട് പോലീസിനെ വിവരമറിയിക്കുകയായിരുന്നു. തുടര്‍ന്ന് കേരളാ പോലീസ് ഷാനിബിന്റെ ബന്ധുക്കളോട് വിവരം തേടി.

ഏപ്രില്‍ 13 നാണ് ഷാനിബ് വീട്ടില്‍ നിന്നും പുറപ്പെട്ടതെന്നാണ് ബന്ധുക്കള്‍ പോലീസിന് നല്‍കിയ വിവരം. ബെംഗളൂരുവില്‍ ജോലി ലഭിച്ച് എന്ന് പറഞ്ഞാണ് ഇയാള്‍ വീട്ടില്‍ നിന്ന് ഇറങ്ങിയത്. ഏപ്രില്‍ 17 നാണ് യുവാവ് വീട്ടുകാരുമായി ബന്ധപ്പെട്ടത്. ഇനി തന്നെ വിളിക്കരുതെന്നും തിരക്കാണ് എന്നുമാണ് ഇയാള്‍ അവസാനം വിളിച്ചപ്പോള്‍ വീട്ടുകാരോട് പറഞ്ഞത് എന്നാണ് വിവരം. ഷാനിബിന്റെ മൃതദേഹം ഏറ്റുവാങ്ങാന്‍ ബന്ധുക്കള്‍ കാശ്മിരിലേക്ക് പോകുമെന്നാണ് സൂചന.