കോഴിക്കോട്: വിദേശത്ത് ജോലി വാഗ്ദാനം ചെയ്തു പലരില്‍ നിന്നായി പണം തട്ടിയ കേസിലെ പ്രതി 'ബില്യണ്‍ എര്‍ത്ത് മൈഗ്രേഷന്‍' സ്ഥാപന ഉടമയും പാലക്കാട് കോരന്‍ചിറ സ്വദേശിയുമായ മാരുകല്ലില്‍ അര്‍ച്ചന തങ്കച്ചനെ (28) പന്നിയങ്കര പോലീസ് അറസ്റ്റ് ചെയ്തു. 'ബില്യണ്‍ എര്‍ത്ത് മൈഗ്രേഷന്‍' സ്ഥാപന മാനേജരെന്ന നിലയില്‍ അര്‍ച്ചന കല്ലായി സ്വദേശിയായ യുവാവിനു വിദേശത്ത് ജോലി നല്‍കാമെന്നു പറഞ്ഞു 3 ലക്ഷം രൂപ വാങ്ങി കബളിപ്പിച്ചെന്നാണ് കേസ്. 2023 മാര്‍ച്ചിലാണ് സംഭവം.

പ്രതി വയനാട് വെള്ളമുണ്ടയില്‍ ഉണ്ടെന്ന വിവരത്തെ തുടര്‍ന്ന് പന്നിയങ്കര പോലീസ് അവിടെയെത്തി പ്രതിയെ കസ്റ്റഡിയില്‍ എടുക്കുകയായിരുന്നു. വിദേശത്ത് ജോലി വാഗ്ദാനം ചെയ്ത് പ്രതി പലരില്‍ നിന്നും പണം വാങ്ങിയിട്ടുണ്ടെന്നും, എറണാകുളത്തും വയനാട്ടിലും കേസുകള്‍ നിലവിലുണ്ടെന്നും പോലീസ് പറഞ്ഞു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.