കൊച്ചി: ഹോട്ടല് ജീവനക്കാരനെ വാഹനം ഇടിച്ചു കൊലപ്പെടുത്തിയെന്ന പരാതിയില് രണ്ട് സിഐഎസ്എഫ് ഉദ്യോഗസ്ഥരെ പോലീസ് കസ്റ്റഡിയിലെടുത്തു. കഴിഞ്ഞ ദിവസം രാത്രിയിലാണ് സംഭവം. അങ്കമാലി തുറവൂര് സ്വദേശി ഐവിന് ജിജോ (25) ആണ് വാഹനം ഇടിച്ചു മരിച്ചത്. സിഐഎസ്എഫ് എസ്ഐ വിനയകുമാര്ദാസ്, കോണ്സ്റ്റബിള് മോഹന് എന്നിവരെയാണ് പോലീസ് കസ്റ്റഡിയിള്ളത്.
നായത്തോട് സെന്റ് ജോണ്സ് ചാപ്പലിന് അടുത്ത് ബുധനാഴ്ച രാത്രി 10 മണിയോടെയാണ് അപകടം. ഉദ്യോഗസ്ഥര് സഞ്ചരിച്ച കാര് ഐവിനെ ഇടിച്ചു തെറിപ്പിക്കുകയായിരുന്നു. ഉടനെ ആശുപത്രിയില് എത്തിച്ചെങ്കിലും ഐവിന് മരിച്ചു. പിന്നീട് നടത്തിയ അന്വേഷണത്തിലാണ് മനഃപൂര്വം വാഹനം ഇടിച്ചതിന്റെ സൂചന ലഭിച്ചത്. ഐവിന് ഹോട്ടലിലെ ഷെഫാണ്. അപകടത്തിനു മുന്പ് ഐവിനും സിഐഎസ്എഫ് ഉദ്യോഗസ്ഥരുമായി വാഹനത്തിനു സൈഡ് കൊടുക്കുന്നതുമായി ബന്ധപ്പെട്ട തര്ക്കം ഉണ്ടായതായി പറയുന്നു. വാഹനം ഇടിച്ച ശേഷം കാറിന്റെ ബോണറ്റില് വീണ ഐവിനെ കാര് നിര്ത്താതെ വലിച്ചിഴച്ചതായും പറയുന്നു.
ഐവിനെ വാഹനം ഇടിച്ചു കൊലപ്പെടുത്തുകയായിരുന്നുവെന്ന ബന്ധുക്കളുടെ പരാതിയിലാണ് പോലീസ് എഫ്ഐആര് റജിസ്റ്റര് ചെയ്തത്. സംഭവ സ്ഥലത്തുവച്ച് നാട്ടുകാരുടെ മര്ദനമേറ്റ വിനയകുമാര് അങ്കമാലിയിലെ ആശുപത്രിയില് ചികിത്സയിലാണ്. സ്ഥലത്തുനിന്ന് ഓടിരക്ഷപ്പെട്ട മോഹനെ വിമാനത്താവളത്തില്നിന്ന് പിന്നീട് പോലീസ് പിടികൂടി.
Related News
