ആലപ്പുഴ: മുന് മന്ത്രിയും സിപിഎം നേതാവുമായ ജി സുധാകരന്റെ പേരില് എഫ്ഐആര് രജിസ്റ്റര് ചെയ്ത് കേസെടുത്ത് അന്വേഷണം നടത്താന് നിര്ദേശിച്ച് മുഖ്യ തിരഞ്ഞെടുപ്പ് ഓഫീസര്. തപാല്വോട്ടുകള് പൊട്ടിച്ച് തിരുത്തിയിട്ടുണ്ടെന്ന വിവാദ വെളിപ്പെടുത്തലിന്റെ പശ്ചാത്തലത്തിലാണ് നിര്ദേശം. അടിയന്തര നടപടി സ്വീകരിക്കാനാണ് ആലപ്പുഴ ജില്ലാ തിരഞ്ഞെടുപ്പ് ഓഫീസറോട് മുഖ്യ തിരഞ്ഞെടുപ്പ് ഓഫീസര് ആവശ്യപ്പെട്ടത്. ഉദ്യോഗസ്ഥര്, ജി സുധാകരന്റെ ആലപ്പുഴയിലെ വീട്ടിലെത്തി മൊഴിയെടുത്തു.
ആലപ്പുഴയില് എന്ജിഒ യൂണിയന് സമ്മേളനത്തിലാണ് സുധാകരന് വിവാദ പരാമര്ശം നടത്തിയത്. 1989ല് പാര്ലമെന്റ് തിരഞ്ഞെടുപ്പില് ആലപ്പുഴയില് കെവി ദേവദാസ് സിപിഎം സ്ഥാനാര്ത്ഥിയായി മത്സരിച്ചപ്പോഴാണ് താന് ഉള്പ്പെടെയുള്ളവര് തപാല് വോട്ട് തിരുത്തിയെന്ന് സുധാകരന് പറയുന്നത്. സിപിഎം ജില്ലാ കമ്മിറ്റി ഓഫീസില് വച്ച് സര്ക്കാര് ജീവനക്കാരുടെ തപാല് വോട്ടുകള് തിരുത്തിയെന്നായിരുന്നു വെളിപ്പെടുത്തല്. 36 വര്ഷം മുമ്പത്തെ തിരഞ്ഞെടുപ്പില് കോണ്ഗ്രസ് സ്ഥാനാര്ത്ഥി വക്കം പുരുഷോത്തമനാണ് വിജയിച്ചത്.
വെളിപ്പെടുത്തലില് തുടര് നടപടിക്കുള്ള നിയമവശം പരിശോധിക്കുകയാണെന്നും അത്യന്തം ഗൗരവമുള്ള കാര്യമാണിതെന്നും കേരളത്തിലെ മുഖ്യ തിരഞ്ഞെടുപ്പ് ഓഫീസര് വ്യക്തമാക്കിയതിന് പിന്നാലെയാണ് കേസെടുക്കാന് നിര്ദേശം നല്കിയത്. തപാല് വോട്ട് പൊട്ടിച്ച് തിരുത്തി വോട്ട് സിപിഎം സ്ഥാനാര്ത്ഥിക്ക് അനുകൂലമാക്കിയെന്നാണ് വെളിപ്പെടുത്തല്. കമ്മീഷന് കേസെടുത്താലും കുഴപ്പമില്ലെന്നാണ് ജി സുധാകരന് പറഞ്ഞത്. തിരഞ്ഞെടുപ്പ് ക്രമക്കേടിനെക്കുറിച്ചുള്ള വെളിപ്പെടുത്തല് തിരഞ്ഞെടുപ്പ് കമ്മീഷന് അവഗണിക്കാനാകില്ല. ഈ സാഹചര്യത്തിലാണ് തുടര് നടപടിയുടെ നിയമവശം തിരഞ്ഞെടുപ്പ് കമ്മീഷന് പരിശോധിക്കുന്നത്.
Related News
