തിരുവനന്തപുരം: വഞ്ചിയൂരില് യുവഅഭിഭാഷകയെ ക്രൂരമായി മര്ദിച്ച കേസില് പ്രതി അഡ്വ. ബെയ്ലിന് ദാസിനെ റിമാന്റ് ചെയ്തു. ജാമ്യാപേക്ഷ കോടതി നിരസിക്കുകയായിരുന്നു. പരാതിക്കാരി ശ്യാമിലി തന്നെ മര്ദിച്ചുവെന്ന് പ്രതിഭാഗം വാദിച്ചെങ്കിലും കോടതി അത് പരിഗണിച്ചില്ല.
പ്രതിക്ക് കുടുംബമുണ്ടെന്നും മൂന്ന് കുട്ടികളുണ്ടെന്നും സമൂഹത്തില് മാന്യതയുള്ള വ്യക്തിയാണെന്നും പ്രതിഭാഗം വാദിച്ചിരുന്നു. എന്നാല് പ്രതി നിയമപരിജ്ഞാനം ഉള്ളയാളാണെന്നും തെളിവുകള് നശിപ്പിക്കാനുള്ള സാധ്യതയുണ്ടെന്നും പ്രോസിക്യൂഷന് വാദിച്ചു. സാക്ഷികളെയും ഇരയെയും സ്വാധീനിക്കാന് സാധ്യതയുണ്ടെന്നും ജാമ്യം അനുവദിക്കരുതെന്നുമായിരുന്നു പ്രോസിക്യൂഷന് വാദം.
മുന്കൂര് ജാമ്യത്തിന് ശ്രമിക്കുന്നതിനിടെ, വ്യാഴാഴ്ച വൈകീട്ട് 6.30ഓടെയാണ് തുമ്പ വി.എസ്.എസ്.സിക്ക് സമീപം സ്റ്റേഷന് കടവില് നിന്നാണ് ഇയാള് സഞ്ചരിച്ച കാര് വളഞ്ഞ് സിനിമ സ്റ്റൈലില് തുമ്പ സി.ഐയുടെ നേതൃത്വത്തില് ബെയ്ലിന് ദാസിനെ കസ്റ്റഡിയിലെടുത്തത്. പിടിയിലാകുമ്പോള് കാറില് ഇയാളുടെ ബന്ധുവുമുണ്ടായിരുന്നു. ബന്ധുവിനെ വിട്ടയച്ച പോലീസ്, ബെയ്ലിന് ദാസിനെ വഞ്ചിയൂര് പോലീസിന് കൈമാറുകയും രാത്രിയോടെ, അറസ്റ്റ് രേഖപ്പെടുത്തുകയുമായിരുന്നു.
Related News
