ആമുഖം :
പൊതു പരീക്ഷാ ഫലപ്രഖ്യാപനത്തിന് ശേഷം, എല്ലാ വിഷയങ്ങളിലും 'A+' നേടിയ വിദ്യാര്‍ത്ഥികളുടെ എണ്ണം (Full A+) ഒരു പതിവ് ചര്‍ച്ചാ വിഷയമാണ്. കേരളത്തിലെ വിദ്യാഭ്യാസ സാഹചര്യത്തില്‍, ഈ പ്രതിഭാസം ഗൗരവമായ അക്കാദമിക വിശകലനത്തിന് അര്‍ഹിക്കുന്നു. എട്ടാം ക്ലാസ്സില്‍ പ്രവേശനം നേടുന്ന വിദ്യാര്‍ത്ഥികളുടെ അടിസ്ഥാന നിലവാരം മുതല്‍ പൊതു പരീക്ഷയിലെ വിജയം, 'Full A+' നേട്ടം എന്നിവയെ സ്വാധീനിക്കുന്നു എന്നത് നിസ്തര്‍ക്കമായ ഒരു വസ്തുതയാണ്.

പ്രധാന ചോദ്യം:
ചില വിദ്യാഭ്യാസ സ്ഥാപനങ്ങളില്‍ 'Full A+' നേടിയവരുടെ എണ്ണം എങ്ങനെ വര്‍ധിക്കുന്നു?

കേസ് പഠനം:
ഈ വിഷയം ലളിതമായി മനസ്സിലാക്കുന്നതിനായി, കൂടുതല്‍ വിദ്യാര്‍ത്ഥികളുള്ള ഒരു സ്ഥാപനത്തെയും താരതമ്യേന കുറഞ്ഞ വിദ്യാര്‍ത്ഥികളുള്ള ഒരു സ്ഥാപനത്തെയും നമുക്ക് താരതമ്യം ചെയ്യാം. 2024-25 അധ്യയന വര്‍ഷത്തിലെ ഒരു വലിയ വിദ്യാലയത്തിലെയും ഒരു ചെറിയ വിദ്യാലയത്തിലെയും പരീക്ഷാഫലങ്ങള്‍ താഴെ നല്‍കുന്നു:

ചെറിയ വിദ്യാലയത്തിലെ വിജയ ശതമാനം: 99.5%
വലിയ വിദ്യാലയത്തിലെ വിജയ ശതമാനം: 99.68%
'Full A+' നേടിയവരുടെ എണ്ണം (ചെറിയ വിദ്യാലയം): 32
'Full A+' നേടിയവരുടെ എണ്ണം (വലിയ വിദ്യാലയം): 69
ഈ രണ്ട് സ്ഥാപനങ്ങളിലെയും വിജയ ശതമാനവും 'Full A+' നേടിയവരുടെ എണ്ണവും തമ്മിലുള്ള ബന്ധം നമുക്ക് പരിശോധിക്കാം. നിലവിലെ ഗ്രേഡിംഗ് രീതി അനുസരിച്ച്, ഒന്നോ രണ്ടോ വിഷയങ്ങളില്‍ 'A+' നഷ്ടപ്പെട്ട ശരാശരി നിലവാരമുള്ള വിദ്യാര്‍ത്ഥികള്‍ക്ക് പോലും ഗ്രേസ് മാര്‍ക്കിന്റെ സഹായത്തോടെ 'Full A+' എന്ന നേട്ടം കൈവരിക്കാന്‍ സാധിക്കുന്നു.

ഗ്രേസ് മാര്‍ക്കിന്റെ സ്വാധീനം:
ഈ രണ്ട് വിദ്യാലയങ്ങളെയും ഗ്രേസ് മാര്‍ക്ക് എങ്ങനെ സ്വാധീനിച്ചു എന്ന് പരിശോധിക്കുന്നതിന് മുമ്പ്, വിദ്യാര്‍ത്ഥികള്‍ക്ക് ഗ്രേസ് മാര്‍ക്ക് ലഭിക്കുന്നതിനുള്ള മാനദണ്ഡങ്ങള്‍ എന്തൊക്കെയാണെന്ന് നോക്കാം.
സര്‍ക്കാര്‍ അംഗീകൃത ക്ലബ്ബുകളില്‍ അംഗത്വമുള്ള വിദ്യാര്‍ത്ഥികള്‍ക്കാണ് ഗ്രേസ് മാര്‍ക്കിന് അര്‍ഹതയുള്ളത്.
ഉദാഹരണത്തിന്:

SPC - 20 മാര്‍ക്ക് (പ്രവേശന പരിധി: 44 വിദ്യാര്‍ത്ഥികള്‍)
Scouts & Guides 20 മാര്‍ക്ക് (പ്രവേശന പരിധി: 60 വിദ്യാര്‍ത്ഥികള്‍)
JRC 10 മാര്‍ക്ക് (പ്രവേശന പരിധി: 30 വിദ്യാര്‍ത്ഥികള്‍)
Little Kites 15 മാര്‍ക്ക് (പ്രവേശന പരിധി: 40 വിദ്യാര്‍ത്ഥികള്‍)

രണ്ട് വിദ്യാലയങ്ങളിലും മേല്‍പറഞ്ഞ എല്ലാ ക്ലബ്ബുകളും പ്രവര്‍ത്തിക്കുന്നു എന്ന് കരുതുക. വിദ്യാര്‍ത്ഥികളുടെ എണ്ണം കുറഞ്ഞ വിദ്യാലയങ്ങളില്‍, മിക്കവാറും എല്ലാ വിദ്യാര്‍ത്ഥികള്‍ക്കും ഏതെങ്കിലും ഒരു ക്ലബ്ബില്‍ അംഗമാകാന്‍ സാധ്യതയുണ്ട്. നിലവിലെ നിയമങ്ങള്‍ അനുസരിച്ച്, ഈ വിദ്യാര്‍ത്ഥികളെല്ലാം ഗ്രേസ് മാര്‍ക്കിന് അര്‍ഹരാകുകയും, ഇത് കൂടുതല്‍ വിദ്യാര്‍ത്ഥികള്‍ക്ക് 'Full A+' എന്ന നേട്ടം നല്‍കുകയും ചെയ്യുന്നു.

ഓരോ ക്ലബ്ബിലേക്കും പരിമിതമായ എണ്ണം വിദ്യാര്‍ത്ഥികളെ മാത്രമേ തിരഞ്ഞെടുക്കാന്‍ സാധിക്കൂ എന്നതിനാല്‍, കൂടുതല്‍ വിദ്യാര്‍ത്ഥികള്‍ പഠിക്കുന്ന വലിയ വിദ്യാലയങ്ങളില്‍ താരതമ്യേന കുറഞ്ഞ വിദ്യാര്‍ത്ഥികള്‍ക്ക് മാത്രമേ വിവിധ ക്ലബ്ബുകളില്‍ അംഗത്വം ലഭിക്കുന്നുള്ളൂ. അതായത്, ചെറിയ വിദ്യാലയത്തിലെ മിക്കവാറും മുഴുവന്‍ വിദ്യാര്‍ത്ഥികള്‍ക്കും ഗ്രേസ് മാര്‍ക്ക് ലഭിക്കുമ്പോള്‍, വലിയ വിദ്യാലയത്തിലെ 20 ശതമാനത്തില്‍ താഴെ വിദ്യാര്‍ത്ഥികള്‍ക്ക് മാത്രമേ ഈ ആനുകൂല്യം ലഭിക്കുന്നുള്ളൂ. ഇത് ഒരു തരത്തില്‍ അനീതിയാണ്. വിദ്യാര്‍ത്ഥികളുടെ എണ്ണം കൂടുതലായതുകൊണ്ട് മാത്രം 'Full A+' നേടുന്നവരുടെ എണ്ണം ഗണ്യമായി കുറയുന്നത് ഗ്രേഡിംഗ് സമ്പ്രദായത്തിലെ അശാസ്ത്രീയതയുടെ ഫലമാണ്. ഈ രീതിയില്‍ മാറ്റം വരുത്തേണ്ടത് അനിവാര്യമാണ്. വിവിധ ക്ലബ്ബുകളില്‍ പ്രവര്‍ത്തിക്കാന്‍ താല്പര്യമുള്ള എല്ലാ വിദ്യാര്‍ത്ഥികള്‍ക്കും അവസരം നല്‍കിയാല്‍
ഈ പ്രശ്‌നത്തിന് ഒരു പരിധി വരെ പരിഹാരം കാണാന്‍ സാധിക്കും.

ഉപസംഹാരം :
ചുരുക്കത്തില്‍, ഒരു വിദ്യാഭ്യാസ സ്ഥാപനത്തിലെ വിദ്യാര്‍ത്ഥികളുടെ എണ്ണവും, ക്ലബ്ബുകളുടെ എണ്ണവും അവയുടെ യൂണിറ്റുകളുടെ എണ്ണവും 'Full A+' എന്ന നേട്ടം ലഭിക്കുന്നതില്‍ നിര്‍ണായക പങ്കുവഹിക്കുന്നു. ഈ വസ്തുത ഓരോ സ്‌കൂളിലും ഗ്രെയ്സ് മാര്‍ക്കിലൂടെ Full A+ ലേക്ക് ഉയര്‍ന്ന കുട്ടികളുടെ എണ്ണം പരിശോധിച്ചാല്‍ വ്യക്തമാകും.

ഇപ്പോള്‍ നിങ്ങള്‍ക്ക് മനസ്സിലായിക്കാണുമല്ലോ, ചില വിദ്യാഭ്യാസ സ്ഥാപനങ്ങളില്‍ 'Full A+' നേടിയവരുടെ എണ്ണം വര്‍ധിക്കുന്നതിലെ ആശാസ്ത്രീയമായ ഗ്രേഡിങ് സമ്പ്രദായം.

ഇ.പി.ഉബൈദുല്ല, വണ്ടൂര്‍
Mobile # 9400740007
E-mail : ubaidelat@gmail.com