കൊച്ചി: മൂന്നര വയസ്സുകാരിയായ മകളെ പുഴയില്‍ എറിഞ്ഞ് കൊലപ്പെടുത്തിയ കേസില്‍ പ്രതിയായ അമ്മയെ മൂഴിക്കുളം പാലത്തില്‍ എത്തിച്ച് പോലീസ് തെളിവെടുപ്പ് നടത്തി. പാലത്തിന്റെ മധ്യഭാഗത്ത് എത്തുന്നതിനു മുന്‍പ് ഇവിടെ വച്ചാണ് മകളെ പുഴയിലേക്ക് എറിഞ്ഞതെന്ന് പ്രതി പോലീസിനോട് പറഞ്ഞു. മുഖം റച്ചായിരുന്നു പ്രതിയെ സ്ഥലത്തു കൊണ്ടുവന്നത്. പ്രതിയുടെ മുഖം കാണിക്കണമെന്ന് പ്രദേശവാസികള്‍ ആക്രോശിച്ചുകൊണ്ടിരുന്നു. വൈകാരികമായാണ് നാട്ടുകാര്‍ പോലീസിനോട് പെരുമാറിയത്.

തെളിവെടുപ്പിനു ശേഷം പ്രതിയുമായി പൊലീസ്, സ്റ്റേഷനിലേക്ക് മടങ്ങി. 10 മിനിറ്റ് മാത്രമാണ് തെളിവെടുപ്പ് നീണ്ടത്. കുട്ടിയ്ക്ക് വേണ്ടിയുള്ള രക്ഷാപ്രവര്‍ത്തനത്തില്‍ പങ്കാളികളായ നാട്ടുകാര്‍ അടക്കം നിരവധി പേരാണ് പ്രദേശത്ത് തടിച്ചുകൂടിയത്.


കുട്ടി അതിക്രൂര പീഡനത്തിനിരയായത് അറിഞ്ഞില്ലെന്നാണ് അമ്മ പാലീസിന് മൊഴി നല്‍കിയത്. ഭര്‍ത്താവിന്റെ വീട്ടുകാര്‍ കുട്ടിയില്‍ അമിതമായി താത്പര്യം കാണിച്ചത് തന്നെ അസ്വസ്ഥതപ്പെടുത്തിയെന്നും യുവതി പറഞ്ഞു. ഭര്‍ത്താവിന്റെ വീട്ടുകാര്‍ കുട്ടിയില്‍ നിന്ന് പോലും തന്നെ അകറ്റുന്നതായി തോന്നി. ഭര്‍ത്താവ് മറ്റൊരു വിവാഹത്തിനൊരുങ്ങുന്നതായി തനിക്ക് വിവരം കിട്ടിയിരുന്നു. തന്നെ ഒഴിവാക്കിയാല്‍ കുട്ടി എങ്ങനെ ജീവിക്കുമെന്ന ആശങ്കയുണ്ടാക്കി. രണ്ടാനമ്മയുടെ കീഴില്‍ തന്റെ കുഞ്ഞ് ജീവിക്കുന്നത് ദുഃസ്വപ്നം കണ്ടെന്നും കുഞ്ഞിന്റെ ഭാവിയില്‍ ആശങ്കയുണ്ടായതിനാലാണ് കൊലപ്പെടുത്തിയതെന്നും യുവതി മൊഴി നല്‍കിയെന്നാണ് വിവരം.