കൊച്ചി: റോഡിലേക്ക് മറിഞ്ഞു വീണ വൈദ്യുതി പോസ്റ്റിലിടിച്ച് ബൈക്ക് ഇടിച്ച് ബൈക്ക് യാത്രികനായ മൗലവി മരിച്ചു. ഇതേ പോസ്റ്റിലിടിച്ച് ബൈക്ക് മറിഞ്ഞ് ക്ഷേത്രത്തിലെ ശാന്തിക്കും പരുക്കേറ്റു. കുമ്പളം നോര്‍ത്ത് പള്ളിയിലെ മൗലവി അബ്ദുല്‍ ഗഫൂര്‍ (54) ആണ് മരിച്ചത്. ശനിയാഴ്ച്ച പുലര്‍ച്ചെ 4.30 ഓടെ കുമ്പളം പി.ഡബ്ല്യു.ഡി റോഡില്‍ പ്രണവം ബസ് സ്റ്റോപ്പിനടുത്തായിരുന്നു അപകടം.

പ്രഭാത പ്രാര്‍ഥനക്കായി പള്ളിയിലേക്കു പോയ ഇമാമിന്റെ ബൈക്ക് റോഡിന് കുറുകെ കിടന്ന പോസ്റ്റിലിടിക്കുകയായിരുന്നു. ഗുരുതര പരിക്കേറ്റ് വഴിയില്‍ വീണ് കിടന്ന ഇദ്ദേഹത്തെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. പുലര്‍ച്ചെ ക്ഷേത്രത്തിലേയ്ക്ക് പോയ ശാന്തി കുമ്പളം കൊട്ടാരത്തില്‍ സുരേഷിന്റെ (58) വാഹനവും പോസ്റ്റിലിടിച്ച് മറിഞ്ഞു. പരിക്കേറ്റ ഇയാളെ നെട്ടൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ഇവിടെ അടുത്തുള്ള വീട്ടിലേയ്ക്ക് വൈദ്യുതി എത്തിക്കാനായി രണ്ടാഴ്ച മുമ്പ് സ്ഥാപിച്ച പോസ്റ്റാണ് മഴയെ തുടര്‍ന്ന് മറിഞ്ഞു വീണത്.