മലപ്പുറം: 2025 പ്ലസ്ടു പരീക്ഷാ ഫലം വന്നപ്പോള് മിന്നുന്ന ജയം കരസ്ഥമാക്കി പാണ്ടിക്കാട് ഗവണ്മെന്റ് ഹയര് സെക്കണ്ടറി സ്കൂള്. അഞ്ചു വ്യത്യസ്ത കോമ്പിനേഷനുകളിലായി ഏഴ് ബാച്ച് പ്ലസ്ടു വിദ്യാര്ത്ഥികളുടെ പരീക്ഷാഫലം വന്നപ്പോള് ഇരുപത്തി അഞ്ച് വിദ്യാര്ത്ഥികള് മുഴുവന് വിഷയങ്ങള്ക്കും എ പ്ലസ് കരസ്ഥമാക്കി. അന്പത്തിയാറ് വിദ്യാര്ത്ഥികളാണ് തൊണ്ണൂറ് ശതമാനത്തിനു മേല് മാര്ക്കു നേടി തിളക്കമാര്ന്ന വിജയം നേടിയത്. സംസ്ഥാനത്തൊട്ടാകെ ഹയര് സെക്കണ്ടറി പരീക്ഷാ ഫലത്തിലും എപ്ലസ് എണ്ണത്തിലും കുറവുവന്നപ്പോള് പാണ്ടിക്കാട് ഗവണ്മെന്റ് ഹയര് സെക്കണ്ടറി സ്കൂള് മികച്ച വിജയശതമാനം നില നിര്ത്തി. സയന്സ് വിഭാഗത്തില് 84 ശതമാനവും ഹ്യുമാനിറ്റീസ് വിഭാഗത്തില് 82 ശതമാനവും കൊമേഴ്സ് വിഭാഗത്തില് 64 ശതമാനവും വിദ്യാര്ത്ഥികള് ഉന്നത പഠനത്തിന് യോഗ്യത നേടി.
ജില്ലയിലെ സര്ക്കാര് വിദ്യാലയങ്ങളില് കൂടുതല് വിദ്യാര്ത്ഥികളെ പരീക്ഷയ്ക്ക് ഇരുത്തുന്ന വിദ്യാലയങ്ങളിലൊന്നായ പാണ്ടിക്കാട് ഗവണ്മെന്റ് ഹയര് സെക്കണ്ടറി സ്കൂളിന്റെ അഭിമാനാര്ഹമായ വിജയത്തിന്റെ സന്തോഷം പങ്കിടാന് സ്കൂള് പി ടി എ , എസ് എം സി , സ്റ്റാഫ് കൗണ്സില് എന്നിവയുടെ സംയുക്താഭിമുഖ്യത്തില് സ്കൂളില് നിറപ്പൊലിമയോടെ വിജയാരവം സംഘടിപ്പിച്ചു. സന്തോഷ സൂചകമായി ഉന്നത വിജയം കരസ്ഥമാക്കിയ വിദ്യാര്ത്ഥികളും രക്ഷിതാക്കളും അധ്യാപകരും പി ടി എ , എസ് എം സി , പൂര്വ്വവിദ്യാര്ത്ഥി പ്രതിനിധികള് അടക്കം ഒത്തുചേര്ന്ന് കേക്ക് മുറിച്ചും മധുരം പങ്കിട്ടും വിജയികള്ക്കുള്ള പുരസ്കാരങ്ങള് സമ്മാനിച്ചു.
വിജയാരവ ചടങ്ങിന് പ്രിന്സിപ്പല് ഇന് ചാര്ജ് മുഹമ്മദ് സിയാവുദ്ദീന് സി , പി ടി എ പ്രസിഡന്റ് എം കെ കുഞ്ഞി മുഹമ്മദ് , എസ് എം സി ചെയര്മാന് ഉമ്മര് മാസ്റ്റര് , എച്ച് എം ഇന് ചാര്ജ് ഇ എം ഉണ്ണികൃഷ്ണന് , പി ടി എ വൈസ് പ്രസിഡന്റ് അഷ്റഫ് പിലാക്കല് , എസ് എം സി വൈസ് ചെയര്മാന് സക്കീര് പൊടുവണ്ണി , പൂര്വ്വ വിദ്യാര്ത്ഥി പ്രതിനിധി സുബൈര് മാസ്റ്റര്, സ്റ്റാഫ് സെക്രട്ടറി ടി എസ് ഡാനിഷ്, അധ്യാപകരായ പ്രസാദ്, ശിവപ്രകാശ് , അഫ്സല് , സുജ , ഷംസുന്നിസ , ഷീബ , അനീഷ് കുമാര്, അജേഷ് എം വി , ഓമന , മുഹമ്മദ് അന്സാര്, അജേഷ് എ , ഭാഗ്യജിത്ത്, ബിന്ദു എന്നിവര് നേതൃത്വം നല്കി.
Related News
