മലപ്പുറം: പിണറായിയുടെ മുന്പില് പരാജയത്തിന് തലവെച്ച് കൊടുക്കാന് കഴിയില്ലെന്നും ക്രിസ്ത്യന് സ്ഥാനാര്ഥിയാണ് മണ്ഡലത്തിന് നല്ലതെന്നും മുന് എം.എല്.എ പി.വി. അന്വര്. നിലമ്പൂരില് ജയിക്കുന്ന സ്ഥാനാര്ഥിയെ നിര്ത്തണം. എല്ലാ വിഭാഗത്തിന്റെ പിന്തുണ ലഭിക്കുന്ന നേതാവിനെയാവണം സ്ഥാനാര്ഥിയാക്കാന്. യു.ഡി.എഫിനെ സംബന്ധിച്ചും കേരളത്തിനെ സംബന്ധിച്ചും വളരെ നിര്ണായകമായൊരു തെരഞ്ഞെടുപ്പാണിതെന്ന് അദ്ദേഹം പറഞ്ഞു.
വരാനിരിക്കുന്ന 140 മണ്ഡലങ്ങളില് കേരളത്തിലെ വോട്ടര്മാരുടെ മാനസികാവസ്ഥ അളക്കുന്ന തെരഞ്ഞെടുപ്പ് കൂടിയാണിത്. ആ നിലക്ക് ആലോചിച്ചിട്ടുള്ള ഒരു നല്ല തീരുമാനം യു.ഡി.എഫില് നിന്നും ഉണ്ടാകുമെന്നാണ് താന് പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്ത്തു. പിണറായിയുടെ മുന്പില് ഒരു പരാജയം അതിന് തല വച്ചുകൊടുക്കാന് ഒരിക്കലും എന്നെ സംബന്ധിച്ച് സാധിക്കില്ല. അതിനല്ലല്ലോ രാജിവച്ചത്. ആ നിലക്കുള്ള ഒരു ആലോചന അതില് നടക്കണം. ീരുമാനമെടുക്കാനുള്ള എല്ലാ അധികാരവും യു.ഡി.എഫിനുണ്ടെന്നും അന്വര് പറഞ്ഞു.
ബി.ജെ.പിക്ക് നിലമ്പൂരില് സ്ഥാനാര്ഥിയുണ്ടാകില്ലെന്ന് ഞാന് രണ്ട് മാസം മുന്പെ പറഞ്ഞതാണ്. സി.പി.എമ്മും ആര്.എസ്.എസും ബി.ജെ.പിയും പച്ചയായിട്ട് കൈ കോര്ക്കുകയല്ലേ. ഇതല്ലേ എട്ട് മാസം മുന്പ് ഞാന് പറഞ്ഞുവന്നത്. അതിലേക്കല്ലേ കേരളം പോയ്ക്കൊണ്ടിരിക്കുന്നത്. ഇതൊക്കെ കാണുമ്പോഴും ഇത് മനസിലാകാത്ത ആളുകള് ഇവിടെയുണ്ടെങ്കില് നിവൃത്തിയൊന്നുമില്ലെന്ന് അന്വര് പറഞ്ഞു. നിലമ്പൂരിലെയും കേരളത്തിലെയും ജനങ്ങള് അത് തിരിച്ചറിയുമെന്നും ലീഡര്ഷിപ്പിന് അത് തിരിച്ചറിയാന് കഴിയുന്നില്ലെങ്കില് ജനങ്ങള് അത് തിരുത്തുമെന്നും അന്വര് പറഞ്ഞു.
Related News
