മലപ്പുറം: പി.വി. അന്വറിന്റെ സമ്മര്ദം ഏശിയില്ല നിലമ്പൂരില് ഉപതെരഞ്ഞെടുപ്പില് യു.ഡി.എഫ് സ്ഥാനാര്ഥി ആര്യാടന് ഷൗക്കത്ത് തന്നെ. എ.ഐ.സി.സി ആണ് ഔദ്യോഗിക പ്രഖ്യാപനം നടത്തിയത്. പി.വി. അന്വറിന്റെ സമ്മര്ദത്തിന് വഴങ്ങേണ്ട എന്ന യു.ഡി.എഫ് തീരുമാനം ഹൈക്കാമാന്ഡ് ശരിവെക്കുകയായിരുന്നു.
ആര്യാടന് ഷൗക്കത്തിനെ സ്ഥാനാര്ഥിയാക്കാനുള്ള തീരുമാനം കെ.പി.സി.സി ഹൈക്കമാന്ഡിനെ അറിയിച്ചതിന് തൊട്ടു പിന്നാലെയാണ് ഔദ്യോഗിക പ്രഖ്യാപനവും വന്നത്. എ.ഐ.സി.സി ജനറല് സെക്രട്ടറി കെ.സി വേണുഗോപാലാണ് തീരുമാനം അറിയിച്ചത്. നിലമ്പൂരില് യു.ഡി.എഫിന് വിജയിക്കാനുള്ള സാഹചര്യമുണ്ടെന്നും യോഗം വിലയിരുത്തി.
അതിനിടെ അന്വറിനെ അനുനയിപ്പിക്കാനുള്ള ശ്രമങ്ങളും തുടങ്ങിയിട്ടുണ്ട്. വി.എസ് ജോയിയും ഷൗക്കത്തിന്റെ സ്ഥാനാര്ഥിത്വത്തിന് പൂര്ണ പിന്തുണ പ്രഖ്യാപിച്ചിട്ടുണ്ട്. ഇതും അന്വറിന് തിരിച്ചടിയായി. ഇനി അന്വറിന്റെ നിലപാട് എന്തായിരിക്കും എന്നതാണ് എല്ലാവരും ഉറ്റു നോക്കുന്നത്.
ആര്യാടന് മുഹമ്മദിന്റെ കുത്തക അവസാനിപ്പിച്ച് 2016ലാണ് ഇടത് സ്വതന്ത്രനായി പി.വി. അന്വര് നിലമ്പൂര് പിടിച്ചെടുത്തത്. പിണറായിസത്തെ തകര്ക്കാനായി ആര് യു.ഡി.എഫ് സ്ഥാനാര്ഥിയായാലും പിന്തുണക്കുമെന്നായിരുന്നു നേരത്തേ അന്വര് അറിയിച്ചിരുന്നത്. എന്നാല് പിന്നീട് മലക്കം മറിയുകയായിരുന്നു. ആര്യാടന് ഷൗക്കത്തിനെ സ്ഥാനാര്ഥിയാക്കുന്നതിലെ അതൃപ്തിയും അന്വര് പരസ്യമാക്കിയിരുന്നു. പകരം വി.എസ്. ജോയിയുടെ പേരാണ് അന്വര് നിര്ദേശിച്ചത്. മണ്ഡലത്തില് സി.പി.എം ബിജെപി ഒത്തുകളി ഉണ്ടാവാനുള്ള സാഹചര്യം കണക്കിലെടുത്ത് മണ്ഡലത്തിന് അനുയോജ്യനായത് ക്രിസ്ത്യന് സ്ഥാനാര്ഥി ആണെന്ന് അന്വര് പരസ്യമായി അഭിപ്രായപ്പെട്ടിരുന്നു.
ഷൗക്കത്തിന് പിന്തുണ നല്കണോ വേണ്ടയോ എന്ന കാര്യത്തില് രണ്ടു ദിവസത്തിനകം തീരുമാനം എടുക്കുമെന്ന് അന്വര് വ്യക്തമാക്കി. ജനങ്ങളുടെയും സാമുദായിക നേതാക്കളുടെയും അഭിപ്രായം ആരാഞ്ഞ ശേഷമായിരിക്കും ഇക്കാര്യത്തില് തീരുമാനം എടുക്കുകയെന്നും അദ്ദേഹം വിശദീകരിച്ചു.
Related News
