കണ്ണൂര്‍: ഗൂഗ്ള്‍ മാപ്പ് നോക്കി പോയ കാര്‍ ഒഴുക്കില്‍പ്പെട്ടു. പയ്യന്നൂര്‍ കാനായി വണ്ണാത്തിപ്പുഴ പാലം കടക്കുന്നതിനിടെയാണ് ഇന്നലെ രാത്രിയാണ് കാര്‍ ഒഴുകിപ്പോയി. കാറിലുണ്ടായിരുന്ന യാത്രക്കാരെ നാട്ടുകാര്‍ രക്ഷിച്ചു. കാനായി തോട്ടംകടവ് കഴിഞ്ഞ് മുക്കൂട് പാലം കടക്കുമ്പോഴാണ് അപകകുണ്ടായത്്. പോകല്ലേയെന്ന് നാട്ടുകാര്‍ വിളിച്ചു പറഞ്ഞുവെങ്കിലും മഴയായതിനാല്‍ കാറിലുള്ളവര്‍ കേട്ടില്ല. കാര്‍ നിയന്ത്രണം വിട്ടതോടെ ഭയന്ന് പുഴയില്‍ ചാടിയ മൂന്നുപേരെ നാട്ടുകാര്‍ രക്ഷിച്ചു. യാത്രക്കാരെ രക്ഷപ്പെടുത്തിയെങ്കിലും കാര്‍ ഒഴുകിപ്പോയി. കനത്ത മഴയില്‍ പുഴ കരകവിഞ്ഞൊഴുകുകയാണ്.

പാലത്തിനു മുകളിലൂടയുള്ള വെള്ളത്തിന്റെ കുത്തൊഴുക്ക് മനസിലാക്കാതെ വണ്ടിയിറക്കിയതാണ് അപകട കാരണമെന്ന് നാട്ടുകാര്‍ പറഞ്ഞു. കാറിലുണ്ടായിരുന്ന തൃക്കരിപ്പൂര്‍ ഉടുമ്പുംതല സ്വദേശികളായ ഹുസൈന്‍, മുഹമ്മദ് കുഞ്ഞി, ഹാരിസ് എന്നിവരെയാണ് നാട്ടുകാര്‍ രക്ഷപ്പെടുത്തിയത്. നാട്ടുകാരായ പി. തമ്പാന്‍, എ.വി.ദാമു, ടി.രമേശന്‍ എം. ജോഷി, കാര്‍ത്തിക് ,വൈഷ്ണവ് എന്നിവരുടെ സമയോചിത ഇടപെടലാണ് മൂന്ന് പേരുടെ ജീവന്‍ രക്ഷപ്പെടുത്താന്‍ സഹായിച്ചത്. കാ റിനെ ഇനിയും കണ്ടെത്താനായിട്ടില്ല.