നിലമ്പൂര്: നിലമ്പൂര് നിയമസഭ ഉപതെരഞ്ഞെടുപ്പില് മത്സരിക്കാനില്ലെന്ന് തൃണമൂല് കോണ്ഗ്രസ് നേതാവും മുന് എം.എല്.എയുമായ പി.വി. അന്വര് വ്യക്തമാക്കി. മത്സരിക്കാന് ആവശ്യമായ പണം കൈവശമില്ലെന്നും കോടികളുടെ കടക്കാരനായതിനാലാണ് മത്സരിക്കേണ്ടെന്ന് തീരുമാനിച്ചതെന്നും അന്വര് വാര്ത്താസമ്മേളനത്തില് പറഞ്ഞു. എന്നാല് വി.ഡി. സതീശന് നയിക്കുന്ന യു.ഡി.എഫിലേക്കില്ലെന്നും പിണറായിസത്തിനെതിരെ പോരാട്ടം തുടരുമെന്നും അന്വര് വിശദീകരിച്ചു.
അന്വറില്ലാതെ നിലമ്പൂരില് വിജയിക്കുമെന്നാണ് സതീശന് പറയുന്നത്. അത് സതീശന് പറയുന്നതിന് പിന്നില് ഒരു ശക്തിയുണ്ട്. ആ ശക്തിയാരാണെന്ന് താന് അന്വേഷിച്ചു കൊണ്ടിരിക്കുകയാണ്. അക്കാര്യം അറിഞ്ഞാല് മാധ്യമങ്ങളോട് പറയും. ആര്യാടന് ഷൗക്കത്തിനെ സ്ഥാനാര്ഥിയാക്കാന് പറ്റില്ലെന്ന് പറഞ്ഞതില് കാരണമുണ്ടെന്നും അന്വര് വ്യക്തമാക്കി.
യു.ഡി.എഫില് ചേര്ക്കണമെന്ന് ആവശ്യപ്പെട്ട് താന് ആരുടെയും പുറകെ പോയിട്ടില്ല. യു.ഡി.എഫില് തന്നെ ചേര്ക്കാന് പരിശ്രമിച്ചത് പി.കെ. കുഞ്ഞാലിക്കുട്ടി മാത്രമാണ്. അത് ഇപ്പോഴും തുടരുന്നുണ്ട്. എന്നാല് യു.ഡി.എഫിലെ ചിലര് തനിക്കെതിരെ പ്രവര്ത്തിച്ചെന്ന് അന്വര് ആരോപിച്ചു. എല്.ഡി.എഫില് നിന്ന് എം.എല്.എ സ്ഥാനം രാജിവെച്ച് ഇറങ്ങി വന്നത് ആരെയും കണ്ടിട്ടല്ല. ദൈവത്തെയും സാധാരണക്കാരെയും കണ്ടാണ് താന് ഇറങ്ങി വന്നത്. താന് അധികപ്രസംഗകനാണെന്ന് ചിലര് പറയുന്നു, ആ അധികപ്രസംഗം തുടരും. ഒരുപാട് ശത്രുകളെ താന് ഉണ്ടാക്കിയിട്ടുണ്ട്. ഭൂരിപക്ഷത്തെ കണ്ട് ഭയപ്പെട്ട് പിന്നോട്ടു പോകാന് ഉദ്ദേശിക്കുന്നില്ലെന്നും പിണറായിസത്തിനെതിരായ പോരാട്ടം തുടരുമെന്നും അന്വര് പറഞ്ഞു.
അതേസമയം നിലമ്പൂരില് ആര്യാടന് ഷൗക്കത്തിനെ പിന്തുണയ്ക്കുമെന്നു പരസ്യമായി പ്രഖ്യാപിച്ചാലുടന് പി.വി.അന്വറിനെ അസോഷ്യേറ്റ് അംഗമായി പ്രഖ്യാപിക്കാനാണ് യുഡിഎഫിലെ ധാരണ. യുഡിഎഫിനു പുറത്തുനിര്ത്തിയുള്ള സഹകരണമാണിത്. ഇക്കാര്യം അന്വറിനെ അറിയിക്കാന് യുഡിഎഫ് കണ്വീനര് അടൂര് പ്രകാശിനെ ചുമതലപ്പെടുത്തിയിട്ടുണ്ട്. ഷൗക്കത്തിനുള്ള പിന്തുണയറിയിച്ചാല് അദ്ദേഹവുമായുള്ള സഹകരണം യുഡിഎഫ് ചെയര്മാന് കൂടിയായ പ്രതിപക്ഷ നേതാവ് വി.ഡി.സതീശന് പ്രഖ്യാപിക്കും. തൃണമൂലിന്റെ ഭാഗമാണ് ഇപ്പോള് അന്വര്. തന്റെ പാര്ട്ടിയെ യുഡിഎഫ് ഘടകകക്ഷിയാക്കണമെന്നാണ് അന്വറിന്റെ ആവശ്യം.
Related News
