കൊച്ചി: പ്രമുഖ വ്യവസായി ബോബി ചെമ്മണൂരിനെതിരെ നടി നല്കിയ പരാതിയില് എറണാകുളം മജിസ്ട്രേറ്റ് കോടതിയില് കൊച്ചി സെന്ട്രല് പൊലീസ് കുറ്റപത്രം സമര്പ്പിച്ചു. നടിയ്ക്കെതിരെ നിരന്തരം ദ്വയാര്ഥ പ്രയോഗങ്ങള് നടത്തിയെന്ന് പൊലീസ് കുറ്റപത്രത്തില് പറയുന്നു. നടിയെ അധിക്ഷേപിക്കുക എന്ന ഉദ്ദേശ്യത്തോടെയാണ് ബോബി ചെമ്മണൂര് ദ്വയാര്ഥ പ്രയോഗങ്ങള് നടത്തിയതെന്നും കുറ്റപത്രത്തില് ആരോപിക്കുന്നു.
അഭിമുഖങ്ങളുടെ വിഡിയോ ക്ലിപ്പുകളും നടിയുടെ രഹസ്യമൊഴിയും സാക്ഷി മൊഴികളും കുറ്റപത്രത്തിനൊപ്പം സമര്പ്പിച്ചിട്ടുണ്ട്. ലൈംഗിക അധിക്ഷേപത്തിനൊപ്പം പിന്തുടര്ന്ന് ശല്യം ചെയ്തതിനെതിരെയും കുറ്റപത്രത്തില് പരാമര്ശമുണ്ട്. സമൂഹമാധ്യമങ്ങളിലൂടെ പലര്ക്കുമെതിരെ ബോബി ചെമ്മണൂര് ലൈംഗികാധിക്ഷേപം നടത്തിയതിന്റെ തെളിവുകളും അന്വേഷണ സംഘം ശേഖരിച്ചിട്ടുണ്ട്.
നേരത്തെ, നടി നല്കിയ ലൈംഗികാധിക്ഷേപ കേസില് ബോബി ചെമ്മണൂര് അറസ്റ്റിലായിരുന്നു. ഹൈക്കോടതി ജാമ്യം അനുവദിച്ചതിനെ തുടര്ന്നാണ് കാക്കനാട് ജയിലില് റിമാന്ഡില് കഴിഞ്ഞിരുന്ന ബോബി ചെമ്മണ്ണൂര് പുറത്തിറങ്ങിയത്. ജയില് മോചിതനായ ശേഷം പരസ്യമായി മാപ്പ് ചോദിച്ച് ബോബി ചെമ്മണൂര് രംഗത്തെത്തിയിരുന്നു. മാര്ക്കറ്റിങ്ങിനായി പലതും പറയാറുണ്ടെന്നും അറിഞ്ഞുകൊണ്ട് ആരെയും ദ്രോഹിച്ചിട്ടില്ലെന്നുമായിരുന്നു പ്രതികരണം.
Related News
