കൊച്ചി: പ്രശസ്ത കാന്സര് രോഗ വിദഗ്ധന് ഡോ. വി പി ഗംഗാധരന് പണം നല്കണമെന്നാവശ്യപ്പെട്ട് വധ ഭീഷണി. മുംബൈയിലെ 'സിറ്റിസണ്സ് ഫോര് ജസ്റ്റിസ്' എന്ന പേരില് അയച്ച കത്തിലൂടെയാണ് ഭീഷണി സന്ദേശം ലഭിച്ചത്. ഡോ. ഗംഗാധരന്റെ ചികിത്സാ പിഴവില് പെണ്കുട്ടി മരിക്കാന് ഇടയായെന്നും തുടര്ന്ന് കുട്ടിയുടെ അമ്മ ആത്മഹത്യ ചെയ്തെന്നുമാണ് കത്തിലെ ആരോപണം. തപാല് വഴി മേയ് 17ന് ലഭിച്ച കത്തിന്റെ പശ്ചാത്തലത്തില് ഡോ. ഗംഗാധരന് മരട് പൊലീസില് പരാതി നല്കി. തുടര്ന്ന് പൊലീസ് അന്വേഷണം ആരംഭിച്ചു.
നീതി തേടി പെണ്കുട്ടിയുടെ പിതാവ് തങ്ങളെ സമീപിച്ചത് പ്രകാരമാണ് ഇടപെടലെന്നാണ് കത്തില് പറയുന്നത്. കത്തില് നല്കിയ ലിങ്ക് അല്ലെങ്കില് ക്യു.ആര് കോഡ് വഴി ബിറ്റ് കോയിന് ആയി 8.25 ലക്ഷം രൂപ നഷ്ടപരിഹാരമായി നല്കണം എന്നാണ് ആവശ്യം. പണം നല്കിയില്ലെങ്കില് ഡോക്ടറുടെയും കുടുംബത്തിന്റെയും ജീവന് അപകടത്തിലാക്കുമെന്നും മുന്നറിയിപ്പുണ്ട്്.
പോലീസ്സൈബര് സെല്, തപാല് വകുപ്പുകളുമായി ഏകോപിപ്പിച്ചാണ് അന്വേഷണം നടത്തുന്നത്. കത്ത് അയച്ച പോസ്റ്റ് ഓഫിസ് നിര്ണയിക്കാന് തപാല് വകുപ്പ് രേഖകള് പരിശോധിച്ചുവരികയാണ്. ഡിജിറ്റല് പേമെന്റ് ലിങ്കും ക്യു.ആര് കോഡും സൈബര് സെല് വഴി കണ്ടെത്താനാണ് നീക്കം
Related News
