ചെര്‍പ്പുളശ്ശേരി : അപൂര്‍വ്വങ്ങളില്‍ അപൂര്‍വ്വമായി കന്നിപ്രസവത്തില്‍ ലഭിച്ച 4 ആണ്‍ കണ്‍മണികള്‍ ജൂണ്‍ 9 ന് ക്ലാസ് മുറികളിലേക്ക്. ചളവറ കുന്നത്ത് മുഹമ്മദ് മുസ്തഫയുടെ ഭാര്യ ദേശമംഗലം സ്വദേശിനി മുബീനക്കുമാണ് അവൂര്‍വ്വങ്ങളില്‍ അപൂര്‍വ്വമായി 2021 ലെ ആദ്യ പ്രസവത്തില്‍ 4 ആണ്‍കുഞ്ഞുങ്ങളെ ഒരുമിച്ച് ലഭിച്ചത്. അയാന്‍ ആദം, അസാന്‍ ആദം, ഐസിന്‍ ആദം, അസ്വിന്‍ ആദം എന്നീപേരുകളും കുട്ടികള്‍ക്ക് നല്‍കി. ആദ്യമാസങ്ങളിലെ പരിശോധനയില്‍ തന്നെ നാലു കുഞ്ഞുങ്ങളുണ്ടെന്ന് ഡോക്ടര്‍മാര്‍ മാതാപിതാക്കളെ അറിയിച്ചിരുന്നു.

പിന്നീട് പെരിന്തല്‍മണ്ണ മൗലാന ആശുപത്രിയിലെ ഗൈനക്കോളജിസ്റ്റ് ഡോ. അബ്ദുള്‍ വഹാബിന്റെ പരിചരണയിലായിരുന്നു. തുടര്‍ന്നുള്ള ചികിത്സയില്‍ 2021 ജനുവരി 16 നാണ് ശസ്ത്രക്രിയയിലൂടെ കുഞ്ഞുങ്ങളെ പുറത്തെടുത്തത്. 4 പേര്‍ക്കും ഒരുമിച്ച് ഒരു സ്‌കൂളില്‍ തന്നെ പ്രവേശനം നേടാനായതില്‍ ഏറെ സന്തോഷത്തിലാണ് മാതാ പിതാക്കളും കുടുംബവും.

ചളവറയിലെ ക്രസന്റ് പബ്ലിക്ക് സ്‌കൂളാണ് 4 പേര്‍ക്കും പ്രവേശനം നല്‍കിയിരിക്കുന്നത്. ജൂണ്‍ 9 നാണ് എല്‍ കെ ജി വിദ്യാര്‍ത്ഥികളുടെ സ്‌കൂള്‍ പ്രവേശനം നിശ്ചയിച്ചിരിക്കുന്നത്. പ്രവേശന ദിവസം ഇവരുടെ പ്രസവത്തിനും, തുടര്‍ന്നുള്ള ചികിത്സക്കും നേതൃത്വം നല്‍കിയിരുന്ന ഡോ. അബ്ദുള്‍ വഹാബും മറ്റുള്ളവരും സ്‌കൂളില്‍ എത്തുന്നുണ്ട്. 4 പേരില്‍ രണ്ട് പേര്‍ക്ക് എല്‍ കെ ജി മുതല്‍ ഏഴാം ക്ലാസ്സ് വരെ പഠനം സൗജന്യമായിരിക്കും.

-ഹംസ ചളവറ