കോഴിക്കോട്: കേരള തീരത്തെ വീണ്ടും ആശങ്കയിലാക്കി വീണ്ടും കപ്പലപകടം. കോഴിക്കോട് തീരത്തിനടുത്ത് ചരക്കുകപ്പലിനു തീപിടിച്ചതാണ് പുതിയ സംഭവം. 50 കണ്ടെയ്‌നറുകള്‍ കടലില്‍ വീണതായാണ് വിവരം. കൊളംബോയില്‍നിന്നു മുംബൈയിലേക്ക് പോയ വാന്‍ഹായ് 503 എന്ന ചരക്കു കപ്പലിലാണ് തീരത്തുനിന്ന് 78 നോട്ടിക്കല്‍ മൈല്‍ (129 കി.മീ) അകലെ വച്ച് തീപിടിച്ചത്. 22 ജീവനക്കാര്‍ കപ്പലില്‍ ഉണ്ടായിരുന്നു. ഇവരില്‍ പലര്‍ക്കും പൊള്ളലേറ്റതായാണ് സൂചന. ഇതില്‍ 18 പേര്‍ കടലില്‍ ചാടിയതായും പറയുന്നു. ഇവര്‍ രക്ഷാബോട്ടുകളില്‍ ഉണ്ടെന്നാണ് വിവരം. ഇവരെ രക്ഷപ്പെടുത്താന്‍ തീരദേശ സേന സംഭവസ്ഥലത്തേക്കുകുതിച്ചിട്ടുണ്ട.

ബേപ്പൂര്‍- അഴീക്കല്‍ തുറമുഖങ്ങള്‍ക്ക് സമീപത്തായാണ് അപകടമുണ്ടായതെന്നാണ് റിപ്പോര്‍ട്ട്. 650ല്‍ അധികം കണ്ടെയ്നറുകള്‍ കപ്പലില്‍ ഉണ്ടായിരുന്നതായാണ് വിവരം. കോസ്റ്റ് ഗാര്‍ഡിന്റെയും നേവിയുടെയും സംഘങ്ങള്‍ കൊച്ചിയില്‍ നിന്നുമാണ് സംഭവ സ്ഥലത്തേയ്ക്ക് പുറപ്പെട്ടിട്ടുള്ളത്. മദര്‍ഷിപ്പുകളില്‍ വരുന്ന കണ്ടെയ്നറുകള്‍ വിവിധ തുറമുഖങ്ങളില്‍ എത്തിക്കുന്ന ഫീഡര്‍ ഷിപ്പാണ് അപകടത്തില്‍പ്പെട്ടതതെന്നാണ് വിവരം. കഴിഞ്ഞ മാസം കൊല്ലം തീരത്തിനടുത്ത് ചരക്കു കപ്പല്‍ മുങ്ങിയ ആശങ്ക വിട്ടൊഴിയുന്നതിനു മുന്‍പാണ് വീണ്ടും തീരദേശത്തെ ആശങ്കയിലാക്കിയിട്ടുള്ളത്. രണ്ടു കപ്പലുകളിലും അപകകടകരമായ സാധനങ്ങളുണ്ടെന്നാണ് സംശയിക്കുന്നത്. നേരത്തെ ഉണ്ടായ അപകടത്തെത്തുടര്‍ന്ന് ഇതുവരെ തെക്കന്‍ തീരദേശമായിരുന്നു ആശങ്കയിലെങ്കില്‍ ഇപ്പോള്‍ വടക്കന്‍ തീരപ്രദേശത്തുകാരും ആശങ്കയിലായിരിക്കുകയാണ്.