കൊച്ചി: താമരശ്ശേരിയില് പത്താംക്ലാസ് വിദ്യാര്ഥിയായിരുന്ന മുഹമ്മദ് ഷഹബാസിനെ കൊലപ്പെടുത്തിയ കേസില് കുറ്റാരോപിതരായ വിദ്യാര്ഥികള്ക്ക് ഹൈകോടതി ജാമ്യം അനുവദിച്ചു. ആറ് വിദ്യാര്ഥികള്ക്കാണ് ഹൈകോടതി ജാമ്യം നല്കിയത്. അന്വേഷണവുമായി സഹകരിക്കുമെന്ന് ഇവരുടെ രക്ഷിതാക്കള് കോടതിയില് സത്യവാങ്മൂലം നല്കണമെന്ന് നിര്ദേശമുണ്ട്.
കോടതി ഇടപെടലിനെ തുടര്ന്ന് ആറ് വിദ്യാര്ഥികള്ക്കും പ്ലസ് വണ് പ്രവേശനം നേടാന് നേരത്തെ അവസരം ലഭിച്ചിരുന്നു. മൂന്നുപേര് താമരശ്ശേരി ഗവ. വൊക്കേഷനല് ഹയര്സെക്കന്ഡറി സ്കൂളിലും മറ്റുള്ളവര് കോഴിക്കോട് നഗരത്തിലെ മറ്റു സ്കൂളുകളിലും പ്രവേശനം നേടിയിരുന്നു. വിദ്യാര്ഥികള്ക്ക് തുടര്പഠനത്തിന് ആവശ്യമായ സൗകര്യങ്ങള് ഒരുക്കണമെന്ന് നേരത്തെ ഹൈകോടതിയുടെ ഉത്തരവുണ്ടായിരുന്നു. പ്ലസ് വണ് പ്രവേശനത്തിന് അനുമതി തേടി പ്രതികള് കോടതിയെ സമീപിക്കുകയായിരുന്നു. കോഴിക്കോട് വെള്ളിമാടുകുന്നിലെ ജുവനൈല് ഒബ്സര്വേഷന് ഹോമിലാണ് കുറ്റാരോപിതരായ കുട്ടികളെ താമസിപ്പിച്ചിരിക്കുന്നത്.
കഴിഞ്ഞ ഫെബ്രുവരി 27നാണ് താമരശ്ശേരിയിലെ സ്വകാര്യ ട്യൂഷന് സെന്ററില് വിദ്യാര്ഥികള് തമ്മിലുണ്ടായ പ്രശ്നത്തെ തുടര്ന്ന് എളേറ്റില് എം.ജെ.എച്ച്.എസ്.എസിലെ പത്താം ക്ലാസ് വിദ്യാര്ഥിയായിരുന്ന മുഹമ്മദ് ഷഹബാസിനെ (15) ഒരു സംഘം വിദ്യാര്ഥികള് ക്രൂരമായി മര്ദിച്ച് കൊലപ്പെടുത്തിയത്.
Related News
