തിരുവനന്തപുരം: അമേരിക്കയില് താമസിക്കുന്ന സ്ത്രീയുടെ പേരില് കവടിയാര് ജവഹര് നഗറിലുള്ള കോടികളുടെ വില വരുന്ന വസ്തുവും വീടും ആള്മാറാട്ടം നടത്തി തട്ടിച്ചെടുത്ത കേസില് പ്രധാന പ്രതി വെണ്ടറും കോണ്ഗ്രസ് നേതാവുമായ അനന്തപുരി മണികണ്ഠന്റെ അറസ്റ്റ് ഉടന് ഉണ്ടായേക്കും. മണികണ്ഠന്റെ മുന്കൂര് ജാമ്യാപേക്ഷ കോടതി തള്ളിയ സാഹചര്യത്തിലാണിത്. വസ്തു വാങ്ങിയ ചന്ദ്രസേനന് ജാമ്യം ലഭിച്ചു. വസ്തു വാങ്ങിയെങ്കിലും പണം കൈമാറ്റം നടത്തിയിട്ടില്ലെന്ന കാരണത്താലാണ് ചന്ദ്രസേനനെ പ്രതി ചേര്ത്തത്. അമേരിക്കയില് താമസിക്കുന്ന ഡോറ അസറിയ ക്രിപ്സിന്റെ പേരിലുള്ള വീടും വസ്തുവും വളര്ത്തുമകളായി നടിച്ച് മെറിന് തട്ടിയെടുത്തെന്നാണ് കേസ്.
അമേരിക്കയില് താമസിക്കുന്ന ഡോറ അസറിയ ക്രിപ്സിന്റെ ഉടമസ്ഥതയിലുള്ള വീടും വസ്തുവും വളര്ത്തു മകളെന്ന പേരില് മെറിന് ജേക്കബ് എന്ന യുവതിക്ക് എഴുതി നല്കിയായിരുന്നു മണികണ്ഠന്റെ തട്ടിപ്പ്. ഇതിനായി ഡോറയുമായി സാദൃശ്യമുള്ള സ്ത്രീയെ സബ്രജിസ്ട്രാര് ഓഫിസിലെത്തിച്ചായിരുന്നു തട്ടിപ്പു നടത്തിയത്. വ്യാജമായി ആധാരവും ആധാര്കാര്ഡും നിര്മിച്ച ശേഷം ഡോറയുമായി രൂപ സാദൃശ്യമുള്ള വസന്തയെ എത്തിച്ച് ആള്മാറാട്ടം നടത്തിയായിരുന്നു തട്ടിപ്പിനു കളമൊരുക്കിയത്. ജനുവരിയില് മെറിന് ജേക്കബ് എന്ന പേരില് വീട് ധനനിശ്ചയം എഴുതിയെടുത്ത ശേഷം ആ മാസം തന്നെ ചന്ദ്രസേനന് എന്നയാള്ക്ക് വിലയാധാരം എഴുതി നല്കുകയായിരുന്നുവെന്ന് പൊലീസ് വെളിപ്പെടുത്തി.
Related News
