തിരുവനന്തപുരം: പൊട്ടിവീണ വൈദ്യുതി ലൈനില്‍നിന്ന് ഷോക്കേറ്റ് യുവാവ് മരിച്ചു. പനയമുട്ടം സ്വദേശി അക്ഷയ് (19) ആണ് മരിച്ചത്. അക്ഷയ്‌ക്കൊപ്പം വിനോദ്, അമല്‍നാഥ് എന്നീ രണ്ട് സുഹൃത്തുക്കള്‍കൂടി ഉണ്ടായിരുന്നു. ഇവര്‍ രണ്ടുപേരും രക്ഷപ്പെട്ടതായാണ് വിവരം. നെടുമങ്ങാട് പനയമുട്ടത്ത് രാത്രി 12 മണിയോടെയായിരുന്നു അപകടം. മരം ഒടിഞ്ഞ് വീണതോടെ വൈദ്യുതി ലൈന്‍ പൊട്ടുകയായിരുന്നു. കാറ്ററിങ് ജോലിക്കു ശേഷം വീട്ടിലേക്ക് മടങ്ങുമ്പോഴായിരുന്നു യുവാക്കള്‍ അപകടത്തില്‍പെട്ടത്. പൊട്ടിവീണ വൈദ്യുതി ലൈനിലേക്ക് അക്ഷയും സുഹൃത്തുക്കളും സഞ്ചരിച്ച ബൈക്ക് കയറിയപ്പോഴായിരുന്നു അപകടം. യുവാവിന്റെ മൃതദേഹം നെടുമങ്ങാട് ആശുപത്രിയിലേക്കു മാറ്റി. ബിരുദ വിദ്യാര്‍ഥിയാണ് മരിച്ച അക്ഷയ്.

ബൈക്കില്‍ മൂന്നുപേരുണ്ടായിരുന്നുവെന്നാണ് വിവരം. അപകടം നടന്നതിനു പിന്നാലെ ഒപ്പമുണ്ടായിരുന്ന സുഹൃത്തുക്കളാണ് നാട്ടുകാരെ വിളിച്ചുകൂട്ടി അക്ഷയിനെ ആശുപത്രിയിലേക്ക് മാറ്റിയത്. വളരെ പഴക്കം ചെന്ന വൈദ്യുത പോസ്റ്റായിരുന്നു ഇവിടെ ഉണ്ടായിരുന്നതെന്നാണ് പ്രദേശവാസികള്‍ പറയുന്നത്. അപകടം നടക്കുമ്പോള്‍ പ്രദേശത്ത് നല്ല മഴയുണ്ടായിരുന്നു. അന്നേരമാകാം മരം ഒടിഞ്ഞ വൈദ്യുതി കമ്പി പൊട്ടിയതെന്ന് സംശയിക്കുന്നു.


കൊല്ലം തേവലക്കര ബോയ്‌സ് സ്‌കൂള്‍ വിദ്യാര്‍ഥി മിഥുന്‍ ഷോക്കേറ്റ് മരിച്ച സംഭവത്തിന്റെ വിവാദത്തിനിടെയാണ് വീണ്ടും വൈദ്യുതി കമ്പിയില്‍നിന്ന് ഷോക്കേറ്റ് രണം. മിഥുന്റെ സംസ്‌കാരം കഴിഞ്ഞ ദിവസം വിളന്തറിയിലെ വീട്ടുവളപ്പില്‍ നടന്നു.