കൊച്ചി: പാലിയേക്കര ടോള് പിരിവില് ഹൈക്കോടതിയുടെ ഇടപെടല്. തകര്ന്ന റോഡിലെ ടോള് പിരിവ് ഒരു മാസത്തേക്ക് നിര്ത്തിവെക്കണമെന്ന് ഹൈകോടതി ഉത്തരവിട്ടു. മണ്ണുത്തി-ഇടപ്പള്ളി ദേശീയപാതയില് രൂക്ഷമായ ഗതാഗതക്കുരുക്കാണ് അനുഭവപ്പെടുന്നത്. ഗതാഗതക്കുരുക്കും റോഡുകളുടെ അവസ്ഥയും സംബന്ധിച്ച് വ്യാപകമായ പരാതി ഉയര്ന്നിരുന്നു. നിലവിലെ അവസ്ഥയില് യാത്രചെയ്യുന്നത് അങ്ങേയറ്റം ബുദ്ധിമുട്ടാണെന്നും ടോള് പിരിക്കുന്നത് നിര്ത്തണമെന്നും ആവശ്യപ്പെട്ട് കെ.പി.സി.സി സെക്രട്ടറി ഷാജി കോടങ്കണ്ടത്താണ് കോടതിയെ സമീപിച്ചത്. ടോള് പിരിവ് എന്നെന്നേക്കുമായി പൂര്ണമായും നിര്ത്തണമെന്നായിരുന്നു ആവശ്യം. എന്നാല്, ഒരുമാസത്തേക്ക് വിലക്കിയാണ് ജസ്റ്റിസ് മുഹമ്മദ് മുഷ്താഖിന്റെ ബെഞ്ച് ഇടക്കാല ഉത്തരവ് പുറപ്പെടുവിച്ചത്. നാലാഴ്ചക്ക് ശേഷം ഹരജി വീണ്ടും പരിഗണിക്കും.
തകര്ന്ന റോഡുകള് നന്നാക്കുമെന്ന് ദേശീയപാത അതോറിറ്റി ഒരുമാസം മുന്പ് നല്കിയ വാക്ക് പാലിച്ചില്ലെന്ന് കോടതി വിമര്ശിച്ചു. എന്നാല് സര്വീസ് റോഡ് സൗകര്യം നല്കിയിരുന്നുവെന്നും സര്വിസ് റോഡ് തകര്ന്നതാണ് ഇപ്പോഴത്തെ പ്രശ്നത്തിന് കാരണമെന്നും ദേശീയപാതാ അതോറിറ്റി വ്യക്തമാക്കി. മൂന്നാഴ്ചയ്ക്കകം പ്രശ്നം പരിഹരിക്കാനാകുമെന്ന് ദേശീയപാതാ അതോറിറ്റി റിപ്പോര്ട്ട് നല്കി. റോഡ് മോശമാണെങ്കില് ടോള് പിരിക്കുന്നത് ശരിയാണോയെന്ന് ഹൈകോടതി ആരാഞ്ഞിരുന്നു. അടിപ്പാതകളുടെ നിര്മാണം നടക്കുന്നതിനാല് രൂക്ഷമായ ഗതാഗതക്കുരുക്ക് ചൂണ്ടിക്കാട്ടി പാലിയേക്കര ടോള് പിരിവ് നിര്ത്തിവെയ്ക്കണമെന്ന് ഹര്ജി പരിഗണിക്കവെയായിരുന്നു ഹൈക്കോടതിയുടെ നിരീക്ഷണം.
നേരത്തെ പാലിയേക്കരയിലെ ടോള്പിരിവ് താത്കാലികമായി നിര്ത്തിവെയ്ക്കാന് തൃശ്ശൂര് ജില്ലാ കലക്ടര് ഉത്തരവിട്ടിരുന്നു. ദേശീയപാതയിലെ അടിപ്പാത നിര്മാണം മൂലമുള്ള ഗതാഗതക്കുരുക്ക് ഒഴിവാക്കി സുഗമമായ ഗതാഗതം ഉറപ്പുവരുത്തുംവരെ പാലിയേക്കരയിലെ ടോള്പിരിവ് നിര്ത്തിവെയ്ക്കണമെന്നാണ് കലക്ടര് ഉത്തരവിട്ടിരുന്നത
Related News
