കൊച്ചി: ദേശീയ പാതയോരങ്ങളിലെ പെട്രോള് പമ്പുകളിലെ ശുചിമുറികള് എല്ലാ യാത്രക്കാര്ക്കും ഉപയോഗിക്കാമെന്ന് ഹൈകോടതി. ഇടക്കാല ഉത്തരവില് ഭേദഗതി വരുത്തിയാണ് ഹൈകോടതിയുടെ നിര്ദേശം. ആര്ക്ക് എപ്പോള് വേണമെങ്കിലും ശുചിമുറികള് ഉപയോഗിക്കാം. സുരക്ഷാവീഴ്ചയുണ്ടെങ്കില് മാത്രമേ ഉപയോഗം തടയാവുവെന്നും ഹൈകോടതി ഉത്തരവിട്ടു.
അതേസമയം, പെട്രോള് പമ്പിലെ ശുചിമുറികളില് തദ്ദേശസ്ഥാപനങ്ങളുടെ ബോര്ഡ് വെക്കരുതെന്നും കോടതി നിര്ദേശിച്ചിട്ടുണ്ട്. പെട്രോള് പമ്പുകളിലെ ശുചിമുറികള് പൊതു ശുചിമുറിയായി ഉപയോഗിക്കാനാകില്ലെന്ന് ഹൈകോടതി ഇടക്കാല ഉത്തരവിറക്കിയിരുന്നു. പെട്രോളിയം ട്രേഡേഴ്സ് ആന്ഡ് ലീഗല് സര്വീസ് സൊസൈറ്റി നല്കിയ റിട്ട് ഹര്ജി പരിഗണിച്ചാണ് തീരുമാനം. പമ്പില് പെട്രോള് അടിക്കാന് എത്തുന്നവര്ക്ക് വേണ്ടിയുള്ളതാണ് ശുചിമുറിയെന്നും കോടതി അന്ന് പറഞ്ഞിരുന്നു. പെട്രോള് പമ്പുകളിലെ ശുചിമുറികളില് പൊതു ജനങ്ങളെ അനുവദിക്കരുതെന്ന് ആവശ്യപ്പെട്ട് സമര്പ്പിക്കപ്പെട്ട റിട്ട് ഹരജിയിലായിരുന്നു കോടതിയുടെ ഉത്തരവ്്. കേരള സര്ക്കാരാണ് കേസില് എതിര്കക്ഷി.
നേരത്തെ പമ്പുകളില് പൊതുടോയ്ലറ്റ് ബോര്ഡ് വെച്ച നടപടിയ്ക്കെതിരെ പെട്രോളിയം ട്രേഡേഴ്സ് വെല്ഫയര് ആന്ഡ് ലീഗല് സര്വീസസ് സൊസൈറ്റിയും തിരുവനന്തപുരം, തൊടുപുഴ നഗരങ്ങളിലെ ചില പമ്പുടമകളും സമര്പ്പിച്ച ഹര്ജികളാണ് ജസ്റ്റിസ് സി.എസ്. ഡയസ് പരിഗണിക്കുകയും ഇടക്കാല ഉത്തരവിറക്കുകയും ചെയ്തത്.
Related News
