തിരുവനന്തപുരം: ഗസ്സയിലെ കുഞ്ഞുങ്ങള്ക്കായി സംസാരിച്ച മലയാളത്തിന്റെ പ്രിയ മുതിര്ന്ന എഴുത്തുകാരി ഡോ. എം ലീലാവതിക്കെതിരെ സൈബര് ആക്രമണം.
തന്റെ 98ാം പിറന്നാളിനായിരുന്നു ഗസ്സയില് നടക്കുന്ന വംശഹത്യക്കെതിരായ ടീച്ചറുടെ പരാമര്ശം. ഇതിനെതിരെ സംഘ്പരിവാര് ഐ.ഡികളില് നിന്നാണ് ആക്രമണമുണ്ടായത്. ലീലാവതിയുടെ പ്രായത്തെപോലും മാനിക്കാത്ത വിധിത്തിലുള്ള അധിക്ഷേപ പോസ്റ്റുകളാണ് സൈബറിടങ്ങളില് ഉണ്ടായത്.
''ഭക്ഷണത്തിനായി പാത്രവും നീട്ടിനല്ക്കുന്ന ഗസ്സയിലെ കുഞ്ഞുങ്ങളെ കാണുമ്പോള് എനിക്ക് എങ്ങനെയാണ് ചോറ് തൊണ്ടയില് നിന്നിറങ്ങുക'' ആശംസകളുമായി എത്തിയവരോടാണ് ടീച്ചര് ഇങ്ങനെ പ്രതികരിച്ചത്.
അതിനിടെ ഡോ. എം.ലീലാവതി ടീച്ചറിനെതിരെയുള്ള സൈബര് ആക്രമണത്തെ വിദ്യാഭ്യാസ മന്ത്രി വി.ശിവന് അപലവിച്ചു. 98 വയസ്സ് പിന്നിട്ട, നമ്മുടെ ഭാഷയ്ക്കും സംസ്കാരത്തിനും അതുല്യമായ സംഭാവനകള് നല്കിയ മഹത് വ്യക്തിത്വമാണ് ടീച്ചര്. ഗസ്സയിലെ കുട്ടികള് വിശന്നിരിക്കുമ്പോള് തനിക്ക് ഉണ്ണാന് തോന്നുന്നില്ല എന്ന് അവര് പറഞ്ഞത്, ഒരു മനുഷ്യസ്നേഹിയുടെ നന്മ നിറഞ്ഞ ഹൃദയത്തില് നിന്ന് വന്ന വാക്കുകളാണ്- അദ്ദേഹം ഫേസ്ബുക്കിലെ കുറിച്ചു.
അത്തരം വാക്കുകളെപ്പോലും നിന്ദ്യമായ ഭാഷയില് സൈബര് ലോകത്ത് ആക്രമിക്കുന്നവരുടെ പ്രവൃത്തി കേരളത്തിന്റെ സാംസ്കാരിക മൂല്യങ്ങളെയും നന്മയെയും ചോദ്യം ചെയ്യുന്നതാണ്. അധ്യാപിക, നിരൂപക, എഴുത്തുകാരി എന്നീ നിലകളില് ലീലാവതി ടീച്ചര് മലയാളത്തിന് നല്കിയ സംഭാവനകള്ക്ക് കേരളം എന്നും കടപ്പെട്ടിരിക്കുന്നു. ലീലാവതി ടീച്ചറെ പോലുള്ളവരെ ആദരിക്കേണ്ടതും സംരക്ഷിക്കേണ്ടതും ഓരോ മലയാളിയുടെയും കടമയാണ്. ഇങ്ങനെയുള്ള സൈബര് ആക്രമണങ്ങള്ക്കെതിരെ ശക്തമായ നിലപാടെടുക്കുകയും സാംസ്കാരിക കേരളം ഒറ്റക്കെട്ടായി പ്രതികരിക്കുകയും ചെയ്യണമെന്നും അദ്ദേഹം കുറിപ്പില് പറഞ്ഞു.
Related News
