കാസര്‍കോട്: മഞ്ചേശ്വരം കടമ്പാറില്‍ അധ്യാപികയും ഭര്‍ത്താവും വിഷം കഴിച്ച് ജീവനൊടുക്കി. സാമ്പത്തിക ബാധ്യതയാണ് ആത്മഹത്യയിലേക്ക് നയിച്ചതെന്നാണ് പ്രാഥമിക നിഗമനം. പെയിന്റിങ് തൊഴിലാളിയായ അജിത്ത് (35), വൊര്‍ക്കാടി ബേക്കറി ജങ്ഷനിലെ സ്വകാര്യ സ്‌കൂള്‍ അധ്യാപികയായ ശ്വേത (27) എന്നിവരാണ് മരിച്ചത്.

ഇരുവരെയും ഇന്നലെ വൈകുന്നേരത്തോടെയാണ് വീടിന്റെ മുറ്റത്ത് തളര്‍ന്നുവീണ നിലയില്‍ അയല്‍വാസികള്‍ കണ്ടെത്തിയത്. ഉടന്‍തന്നെ ഇവരെ ഹൊസങ്കടിയിലെ സ്വകാര്യ ആശുപത്രിയിലും തുടര്‍ന്ന് ദേര്‍ളക്കട്ടയിലെ സ്വകാര്യ ആശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല.

തിങ്കളാഴ്ച ഉച്ചയോടെയാണ് സംഭവം നടന്നതെന്നാണ് പോലീസ് കരുതുന്നത്. ജോലി കഴിഞ്ഞ് നേരത്തെ വീട്ടിലെത്തിയ ശ്വേതയും അജിത്തും തങ്ങളുടെ മൂന്ന് വയസ്സുള്ള മകനെ കൂട്ടി ബന്തിയോട്ടുള്ള ശ്വേതയുടെ സഹോദരിയുടെ വീട്ടിലെത്തി. 'ഒരിടം വരെ പോകാനുണ്ട്, കുട്ടിയെ നോക്കണം' എന്ന് സഹോദരിയോട് പറഞ്ഞ് ഇരുവരും വീട്ടിലേക്ക് മടങ്ങുകയായിരുന്നു. വീട്ടില്‍ തിരിച്ചെത്തിയ ശേഷമാണ് ഇരുവരും വിഷം കഴിച്ചതെന്നാണ് പോലീസ് നിഗമനം.

വൈകുന്നേരത്തോടെ വീടിന്റെ മുറ്റത്ത് അവശനിലയില്‍ കണ്ടെത്തിയ ദമ്പതികളെ അയല്‍ക്കാര്‍ ആശുപത്രിയില്‍ എത്തിക്കുകയായിരുന്നു. ഇന്ന് പുലര്‍ച്ചെയാണ് ഇരുവരും മരിച്ചത്. സാമ്പത്തിക ബാധ്യത കാരണമാണ് ആത്മഹത്യ ചെയ്തതെന്നാണ് പ്രാഥമിക വിവരം. സംഭവത്തില്‍ മഞ്ചേശ്വരം പോലീസ് കേസ് രജിസ്റ്റര്‍ ചെയ്ത് വിശദമായ അന്വേഷണം ആരംഭിച്ചിട്ടുണ്ട്. മൂന്ന് വയസ്സുള്ള മകനെ സഹോദരിയുടെ സംരക്ഷണയിലേക്ക് മാറ്റി.